【CASH音樂奬】盧凱彤《荒原》奪最佳歌曲 監製蔡德才代領獎
撰文：彭嘉彬
出版：更新：
已故女唱作人盧凱彤今晚(11月5日)於CASH金帆音樂奬當中憑遺作《荒原》得到「最佳歌曲大奬」，由監製蔡德才代表上台領奬。蔡德才在台上發表感言表示:「呢首歌其實係關於2個情緒病患嘅人，分別係Ellen同林夕佢哋對情緒病患嘅第一身描述。創作呢首歌嘅原因，第一係希望唔清楚情緒病患嘅大眾可以對呢個病有多啲理解，第二係希望同樣嘅病患者，可以感受到同路人嘅支持，知道自己並唔係孤單。」
監製蔡德才代Ellen上台領奬。 (黃國立攝)
接受《香港01》訪問時，蔡德才懷緬Ellen:「佢由15歲開始已經係一個好勤力嘅人，對生命充滿熱情。佢有好堅強嘅一面，但同時亦有種詩人般嘅敏感。好記得錄緊《荒原》嘅時候，我同佢都喺台灣，我住喺佢屋企，嗰次係同佢相處最耐嘅一次，幾乎一日24小時都對住，當時就好感覺到，原來佢一日嘅情緒會經歷好多顛簸，日頭同夜晚嘅狀態可以好唔同。」
不少樂迷認為《荒原》是一首較黑暗的歌曲，蔡德才與Ellen在創作過程中，又會否刻意避重就輕，令作品不要帶動過多的情緒? 他表示:「呢個係一個好好嘅議題，從來Ellen嘅歌，有好多都偏向比較黑暗，亦係好赤裸直接嘅情緒表達。好似佢以前有首作品叫《燈下黑》，好多人都話好黑暗，但我覺得呢類作品有個重要性係，同類嘅病友聽到，佢哋會知道有人明白佢。即使今次嘅《荒原》，其實最重要嘅一個思想係，當活喺一個咁紛擾嘅世界裡面，我哋點樣去保持自己嘅美麗同尊嚴。」
他亦認為雖然Ellen的作品偏向黑暗，但卻能幫助不少同路人。 (黃國立攝)
灌錄《荒原》時，由於蔡德才住在Ellen家，所以24小時一起工作。特別感受到Ellen一天裡情緒的波動。