AGA演唱會｜七仙羽化解逢開騷必打風宿命：同天文台台長打好關係
撰文：劉傳謙
出版：更新：
AGA（江海迦）將於明年1月29、30日舉行首個個人紅館演唱會《AGA Gaia Live》，經歷過改期，加上早前身體抱恙，AGA終於克服重重波折圓夢。為當日演出順利，AGA的恩師兼監製舒文特意請來七仙羽（七師傅）指點迷津，不但從早前公開的兩款演唱會海報之間挑選，原來舒文當日的衣著也暗藏玄機。
向來不常看風水的舒文，這次特意為AGA找七師傅指點迷津。
七師傅出名鬼馬，面對舒文問到AGA每次開騷都遇上天氣惡劣的問題，七師傅笑說：「係關天文台事嘛，AGA要同天文台台長打好關係，如果台長係AGA男朋友就自然開騷唔會打風啦！」關於兩款演唱會海報，一款是AGA身穿紅色長裙正面看鏡頭，另一款是身穿藍身長裙眼光微微望旁邊，師傅直言前者比較好：「藍色嗰張側住頭，廣東話有一句『窒下窒下』；而紅色裙嗰張霸氣好多，好似塔羅牌上嘅女皇咁！」
問到演唱會成續，七師傅表示門票銷情一定理想，更利用周遭事物與舒文衣著去預測，她說：「你（舒文）件衫上面有『DEAD』，即係先死而後生，然後長出粗壯嘅樹幹，枝葉向四面八方咁生，啲人一定會攀山過海嚟睇！」舒文亦搞笑說：「咁過山當然係大老山啦，過海就過維多利亞港啦，大家都要搭車嚟嘅。」七師傅最後不忘用「師傅愛你」加持AGA，更表示AGA將會得到「自動加持」。
師傅愛AGA！
AGA表示多謝七師傅加持，她說：「希望今次開紅館唔會打風啦，承佢貴言，多謝佢嘅祝福！亦都要多謝舒文，因為知道佢平時唔睇風水，今次為咗我呢個演唱會海報去搵師傅，所以好感恩。好期待演唱會，亦希望到時請到七師傅嚟睇啦。」
AGA感謝七師傅加持。