【探穴者】闖無人之境做全球第一入洞人　港洞穴探險隊憶救人險境

男隊員170米高空被困　女隊長以身犯險拯救

探洞運動對技術要求較高，若發生意外，拯救工作往往十分艱難。彭德玥憶述一次在中國貴州探洞時拯救隊員阿聰的過程，驚險萬分，「嗰次垂降全隊分成三組，我同阿聰係最後一組，阿聰之前已經不停協助隊友下降，體力幾乎耗盡，但我哋已經暴曬咗六個鐘，個個都出現中度中暑徵狀，但我哋又帶唔夠水」。

繩索空中交纏　凌空揮刀割繩救人自救

這時候，在離地170米的高空中，竟發生輔助繩索與主繩交纏的狀況，「阿聰孭住個30公斤嘅袋，加上中暑，佢已經好暈，塊面青晒！」阿聰曾以多個方法嘗試自行解開繩索不果，無計可施下，隊長決定賭上兩人性命，在高空中設計一個滑輪系統，「用我嘅體重將佢呢個大隻佬升起，仲要拎把刀割斷第二條繩，將佢放回主繩上」。被救者阿聰補充，這是一個非常高技巧的操作，「如果割繩時割多咗，隨時連條主繩都割斷埋，兩個人嘅重量，加上我哋孭住嘅嘢，隊長嘅下降器未必承受得到，兩個人就會一齊飛墮落去」。

安全第一　事前須與當地探洞團體聯繫

自救難，救人更難，阿德佩服所有參與泰國少足被困意外的救援人員及專家，「專家唔係萬能，專家都會死，佢哋都係拎條命去救班小朋友，洞穴拯救牽涉大量風險，我要將自己放喺風險上，先可以救到你」，阿德強調，每次探洞均講求安全第一，故需要與當地的探洞團體聯繫，若自己沒法在預期時間內出洞，對方便需派員拯救，「探洞世界就係你有事我一定救你，我有事你都一定救我，探洞後，會發現自己喺世界上多咗一班家人」。

在隊中負責急救的Mandy表示，平日最常為隊員挑刺及割傷，「最怕係探洞時突然有粒石跌落嚟，揼中後面隊員」，故探洞時會帶備一個齊全的急救包，亦會在車上準備一些包紮工具及藥物，以備不時之需。由於隊員到訪的洞穴多是未被開發，開路先鋒阿Ben強調，到達洞口時最怕發生塌方，需視察附近是否安全，再決定是否進入洞內，找路時亦須找一條能讓隊員安全離開的路段，「寧願兜路行耐啲，都好過搵條短啲但危險嘅路段」。

日本探洞發現瀕危生物　洞內睇戲吃關東煮

洞穴探險隊成員笑言，探洞的樂趣難以形容，副隊長Kenji對一次在日本岐阜一次探洞經歷非常難忘，「當地探洞隊熱情好客，平時我哋入洞的裝備盡量輕便，但佢哋居然帶埋腳架及放映器，在洞內播放恐怖電影！」隊員Mandy亦笑言，其中一名日本隊員更裝扮成鬼怪，與他們合照，兩隊成員更在洞內享受關東煮，「喺洞內有得食熱嘢！幾誇張！」Kenji憶述日本探洞之旅時難掩興奮之情，「洞穴嘅溫度一般比外面低，但當時日本落緊雪，洞內嘅溫度相對較暖」，他更在洞內發現一種瀕危物種日本爪鯢（Onychodactylus japonicus），大嘆不枉此行。

下水破壞生態系統　籲觀光客自律

阿德表示，部分洞穴內有河道，暴雨時有機會令水位急速上升，故出發前必須留意天氣預報及熟悉洞穴路線。副隊長Kenji曾帶領本港一班青少年到菲律賓進行生態考察，其間到訪當地一個洞穴觀光，洞內有當地人為做生意，游說他們穿上助浮衣，在洞內的河道游泳。阿德強調，探洞者有責任保護洞內生態，「只要一落水，就會污染水源，破壞整個生態系統，東南亞洞穴資源豐富，但喺管理方面尚待改善」，呼籲入洞穴觀光人士自律，愛惜地質資源。