朴敘俊香港見面會感動到喊　派福利重演《三流之路》撒嬌片段

朴敘俊係一個好真誠、好可愛嘅演員！昨晚朴敘俊到港舉行亞洲巡迴粉絲見面會香港站，呢場見面會就認真精彩喇，因為同粉絲玩得好地地嘅朴敘俊，竟突然落下男兒淚！想知發生咩事？等記者慢慢話你哋知啦！

話說昨晚見面會上，朴敘俊同粉絲分享咗好多自己的小故事，當中他講到早前上映的電影《青年警察》，戲入面飾演學警的他要超短髮剷頭上陣，不過朴敘俊就不以為意：「因為我係演員，所以乜都要試，冇問題！長頭髮都可以！」所謂時尚的完成無非是靠外貌，朴敘俊其實咩髮型都好睇啦！朴敘俊又提到拍檔姜河那：「同姜河那拍攝好有趣，佢好有禮貌，同佢一齊學到好多！」

（觀看更多） 朴敘俊香港見面會被催生B　男神計劃「這時」做爸爸！

除咗《青年警察》之外，朴敘俊仲講到拍《三流之路》的趣事，大家記唔記得朴敘攬實笠住橙色外套嘅金智媛呢一幕？好心動係咪？但原來拍呢一幕時「東萬」笑到收唔到聲！朴敘俊解釋話因為金智媛笠住外套之後，睇落去太似一隻耳塞喇！又真係幾似......oppa想像力會唔會太豐富？朴敘俊又講到半裸上身唱Buzz名曲嘅一幕，原來當時劇本冇寫明要唱咩歌，於是朴敘俊就揀了自己年代最紅的樂隊Buzz，仲特登唱到走晒音！
 

分享拍攝趣事又點夠呢？朴敘俊這晚直情重演經典片段俾大家睇！事緣朴敘俊分享完之後，就同粉絲一齊玩遊戲，展開桌球大戰，輸的話就要派福利俾粉絲，可惜上台嘅兩位粉絲並唔係專業球手，甚至有位粉絲篤白波，引得朴敘俊全程爆笑！不過朴敘俊同樣有姿勢冇實際，疑似故意放水俾粉絲，最後被罰要背抱粉絲、自拍同撒嬌！朴敘俊重演《三流之路》入面的撒嬌情節，仲特登加入港女語氣講：「喂呀！」實在太可愛喇！

同粉絲玩完篤波，朴敘俊又親自煮公仔麵俾幸運粉絲即場食，男神就係男神，煮個公仔麵面都chok過人，平時大家開公仔麵包裝都係用撕的方法吧？朴敘俊就唔同喇，捉住包裝嘅兩頭，展示「力的表現」啪開公仔麵，全場觀眾即刻「嘩嘩聲」！似乎好開心見到粉絲咁好反應嘅朴敘俊話：「睇嚟第時去邊都要帶住幾包！」還一連再啪開三包公仔麵，仲邊啪邊用廣東話打招呼：「大家好～」男神好有幽默感噃！煮完公仔麵，主持麻利亞搞笑cue朴敘俊學TVB劇集，用廣東話講：「你肚唔肚餓呀？我煮個麵你食吖！」估唔到朴敘俊又超級配合學住講，如果睇港劇都見到oppa做戲，你話幾開心呢！

（觀看更多） [朴敘俊香港見面會]完美body的秘密　童年夢想唔係做男神真相是？

朴敘俊為大家準備如此精彩的見面會，粉絲當然亦有驚喜禮物回贈oppa，拍下心意短片送俾朴敘俊，擁有六舊腹肌超man嘅朴敘俊，估唔到睇完片段後感動到忍不住淚水，仲喊到哽咽，用紙巾邊抺眼淚邊多謝粉絲，睇嚟朴敘俊感受到粉絲的真心，場面真係好感動呀！最後朴敘俊與全場粉絲大合照，還encore獻唱才結束這晚的見面會，粉絲離開時，朴敘俊還站在門口前與大家逐一擊掌道別，咁有誠意嘅演員，係值得大家鍾意嘅！

我們01韓迷的facebook專頁Kpop 01已經開始喇！想知道更多韓國娛樂、飲食、玩樂、時尚資訊，快點去給like吧：https://www.facebook.com/hk01.kpop/