香港太好玩！神話M李玟雨決定留低 「我要食咖哩魚蛋」
韓國元祖男團神話成員M李玟雨《2017 LEE MIN WOO FAN PARTY in HONG KONG》，在開場之後就繼續同神話創造（神話粉絲）玩遊戲傾偈。當MC周奕瑋要M喺《天若有情》同《英雄本色》之間二選一時，李玟雨就話：「兩套都係我學生時代非常珍貴嘅電影，兩套戲我都睇超過10次以上，呢個問題簡直就係揀劉德華定係周潤發！不過以前喺神話放送中，我哋都有扮過《英雄本色》，好似揸槍、咬火柴嘅動作等，冇火柴就會用牙籤，所以最後都係揀《英雄本色》！」
攝影：江智騫
距離2018新一年仲有大半個月，問到李玟雨2018年1月1日想同神話隊友JunJin定係Andy一齊睇日出？本身M就揀咗JunJin嘅，佢解釋話因爲2017年同Andy一齊嘅時間太多，所以就揀JunJin，之後又改口風話：「其實係因為如果揀咗Andy，JunJin就會嬲但Andy就唔會。」不過M喺其後玩遊戲嗰時又提返，世上最驚嘅應該係Andy！又話Andy恐怖過鱷魚，一發火就完全唔當佢哋係哥哥添啊！
傾偈傾到中段，神話另一成員申彗星就以嘉賓身份登場，更着住白色印有M字嘅冷衫，唔知係咪為咗李玟雨M Style而特登着嘅呢？其實申彗星現身係為咗要同李玟雨玩wii sport分勝負，輸咗嗰個就要接受「大懲罰」！申彗星仲話佢上次喺台灣都有玩過，更因為太激動差啲跌親，所以今次就玩得比較小心，可能因為咁就輸咗畀M，仲抽中咗sexy dance做大懲罰！雖然申彗星跳得好尷尬，不好好兄弟李玟雨最後都陪佢跳咗兩下，仲大讚佢係世界第一sexy dance添！不過申彗星完全唔收貨，仲話無論如何都要M再跳sexy dance，叫大家要期待一下！
玩遊戲嗰時，M就提到碗仔翅、雞蛋仔、咖哩魚蛋同臭豆腐呢4樣香港街頭小食佢都冇試過，好想試一試，因為之前神話隊友金炯完同Eric就食過臭豆腐，李玟雨只係聞完睇咗一眼就算。最後M仲自爆：「本身聽日就會返韓國，但已經決定咗會留低喺香港旅行，仲會去食咖哩魚蛋，如果你哋係街到見到我嘅話，我會同你哋影相！加上神話出年就係20週年，嚟緊開演唱會嘅話一定會同神話其他成員一齊嚟香港同大家見面！」香港嘅神話創造一定好興奮！
神話M李玟雨香港fan party 自爆：出碟仲緊張過有賊入屋！
下載《香港01》App，更多韓星靚相、影片率先睇！
iOS：http://bit.ly/hk01app-iOS-download
Android：http://bit.ly/hk01app-Android-download
我哋01韓迷嘅facebook專頁Kpop 01已經開咗喇！想知道更多韓國娛樂、飲食、玩樂、時尚資訊，快啲去畀like啦：https://www.facebook.com/hk01.kpop/