《吃貨神探之獵獸行動》李敏豪貼地愛香港檸茶 同河智苑似親姊弟
韓國男演員李敏豪以童星出身，拍過《順風婦產科》、《成均館緋聞》、《擁抱太陽的月亮》、《屋塔房王世子》等著名韓劇。而最近李敏豪就拍咗《醫療船》，劇內飾演河智苑細佬，之後佢就落力發展電影事業，拍過《The bittersweet》（小馬.弗洛伊德）。上星期李敏豪再度嚟香港宣傳電影《吃貨神探之獵獸行動首部曲》，除咗全程要以普通話講對白外，更要唱歌、又要rap、又要跳舞、仲有打戲，好在一啲都難唔倒李敏豪！
攝影：龔嘉盛 場地提供：the sky cinema
其實有follow開李敏豪個人Instagram嘅粉絲就會知道李敏豪成日都上傳喺香港影嘅相，佢表示自己其實嚟過香港超過10次！今次就因為拍攝嘅關係，只係可以進行有關電影拍攝嘅工作，冇得四週圍去玩，但反而就可以更集中喺電影拍攝上。而《吃貨神探之獵獸行動首部曲》係一套圍繞住香港茶餐廳文化嘅電影，問到李敏豪有幾認識香港茶餐廳時？李敏豪就表示：「其實我本來唔識㗎！不過就透過今次拍攝認識更多，知道係本地人常去嘅餐廳。而我最鍾意嘅就係檸茶、菠蘿油、上湯雞絲湯麵、點心等。」其實李敏豪喺講檸茶同菠蘿油個陣仲係用廣東話㗎！即時覺得李敏豪好貼地同香港fans好親近啊！
李敏豪早前拍攝中國電影《小馬.弗洛伊德》時，都有搵老師學習普通話更唱埋OST，而對於今次拍攝《小吃貨神探之獵獸行動》全程都要講普通話對白，佢就話有咗上次經驗，今次拍攝比較順利。不過最大難處都在於普通話，其實背咗對白再講出嚟唔難，係難在唔清楚喺咩位要加入個人感情。好在拍多咗中國電影開始慢慢習慣，反而覺得好有趣慢慢上手。
李敏豪喺訪問中提及自己都鍾意拍打戲，平時鍾意做運動，所以拍打戲對佢嚟講並無太大負擔！李敏豪最近喺電視劇同電影方面同步發展應該會好忙，問到李敏豪私底下點樣放鬆時，佢就表示：「平時都係靠做運動解壓，自己鍾意同朋友出去踢波。」唔知粉絲們有冇機會喺足球場上偶遇李敏豪呢？
更多李敏豪訪問照片
喺訪問開頭都有提及早前李敏豪喺韓劇《醫療船》中飾演河智苑細佬，而係現實生活中，河智苑早前真的不幸失去親細佬田汰遂！問到李敏豪有冇搵過河智苑，李敏豪就話：「其實我有親身去到現場，而河智苑細佬田汰遂更有同我一齊拍過電視劇，我都好傷心，都有安慰河智苑，佢都有話多謝我嚟，真係好似佢細佬咁好疼錫我！」李敏豪同河智苑私下都有繼續聯絡，希望河智苑可以盡快走出陰霾，兩人可以好似親姐弟咁一直相處。
李敏豪拍完《小馬.弗洛伊德》想試異國戀 范冰冰、朱璇好難揀？
下載《香港01》App，更多韓星靚相、影片率先睇！
iOS：http://bit.ly/hk01app-iOS-download
Android：http://bit.ly/hk01app-Android-download
我哋01韓迷嘅facebook專頁Kpop 01已經開咗喇！想知道更多韓國娛樂、飲食、玩樂、時尚資訊，快啲去畀like啦：https://www.facebook.com/hk01.kpop/