周杰倫杭州個唱被搶Fo 女歌迷點唱《算什麼男人》送前男友成熱話
撰文：洪曉璇
出版：更新：
開心時聽歌，唔開心時又要聽歌，情歌最迷人之處，就係大家一邊聽一邊身同感受代入歌詞。周杰倫《地表最強》世界巡迴演唱會，每一站都會有個點歌環節，揀選一位幸運歌迷點唱兼同周董合唱，香港站就曾經點中過何家千金何超蓮，10月28號去到杭州站，一位自稱「小仙女」女歌迷，指「前男友也在現場」並點唱《算什麼男人》，搞到周董都唔知點應對好，不過好爆嘅係網友起底，發現原來呢個小仙女竟然係內地網紅，唔通一切都係做戲？
周杰倫開演唱會，居然會俾一位歌迷搶盡風頭。(視覺中國)
就係呢位小仙女豪情壯語要點歌俾前男友，搞到周杰倫喺台上都嚇到俾唔到反應。(微博圖片)
自稱23歲叫小仙女嘅歌迷，戴住兔仔耳參加周董杭州站演唱會，喺點唱環節一企起身就同周董講：「我前男友也來了。」接著女歌迷說：「他要結婚了，雖然他長得醜，眼睛也瞎了，我還是祝福他，我想點首《算什麼男人》給他。(小仙女挺幽默的啊，這樣說他老婆也可能在現場。)鏡頭拉近一點，讓他老婆看看我長得多漂亮！」一番辛酸剖白引發全場尖叫，讓周董哭笑不得：「第一次遇到這麼特別的點歌。」
小仙女一邊唱一邊哽咽仲眼泛淚光，好多人話呢個係聽過最心酸嘅《算什麼男人》，不過咁樣一唱令小仙女成功一席爆紅，一夜間微博粉絲由2萬幾十級跳至超過23萬，亦有是非隨之而來，有個自稱係小仙女前男友嘅老婆仲出咗篇微博，貼好多張相話：「我覺得我更漂亮，我男朋友很男人」真係花生滿地呀﹗
呢位女歌迷一夜間爆紅，粉絲數量十級跳。(微博截圖)
估唔到有位自稱係小仙女前度老婆嘅人跳出來挑機。(微博圖片)
面尖鼻高眼大大，內地稱之為「網紅臉」。(微博圖片)
不過好戲原來還在後頭，神通廣大嘅網友搵出小仙女嘅微博，發現佢原來本身係網紅，仲有拍戲添﹗有周董Fans就話佢個微博今年3月先開通，相片全部都係擺晒pose典型網紅照，從未喺網上講過鍾意周董，之前仲拍過戲可算係圈中人一名。加上幾次被周董揀中點歌嘅歌迷，咁啱都係網紅或者名人，令人質疑到底係咪演唱會炒作橋段。
有網友點出，周杰倫幾次演唱會都揀中網紅點唱，真係實在太過巧合啦……(微博圖片)
+14