【十大中文金曲】吹奏樂壇變流行經典「40」年 始終叱咤最娛樂性
香港電台在昨晚的《第40屆十大中文金曲－我和你音樂會》頒發最後大獎後，象徵著上年度的樂壇的頒獎典禮正式完結。如果你有收看你會發現今次節目流程上，頒獎似乎是次要，反而集中火力將節目塑造成港台版流行經典「40」年。
今次港台湊合地與商台一樣玩懷舊，眼見「叱咤」玩到出神入化，連冇睇LIVE嘅人都要特登上網重溫，應該實食冇黐牙。加上今年又食正40周年，同大家一齊「念舊」一下都應該。可惜睇完個騷真係要向年輕一輩嘅歌手講聲辛苦哂！經節目安排一班歌手瘋狂翻唱經典歌曲，而且歌曲上以抒情慢歌為主，令到「我和你音樂會」節奏較慢。加上一眾翻唱的歌手演繹一定與原唱有比較，就算唱功再好都被原唱人比下去，而一班網民一邊睇直播一邊鬧，都唔知呢啲算唔算係noise嘅一種？
港台的確曾成就90年代樂壇「四大天王」稱號，而且當時四大天王更紅遍華語樂壇。但在昨晚節目入面卻找來許廷鏗翻唱黎明《情深說話未曾講》；陳柏宇翻唱郭富城《愛的呼喚》；周柏豪翻唱劉德華《一起走過的日子》；吳業坤則翻唱張學友《每天愛你多一些》；似乎相當睇好這4位新一代男歌手，不過用翻唱「四大天王」金曲呢個方法嚟捧佢哋，就算唱得再好也難免一班「鍵盤戰士」網上討論。再者，要捧佢哋又係唔係一定要用上「四大天王」套路呢？究竟港台想佢哋被人鬧還是讚？就算樂壇新舊交替也不一定要將「四大天王」名號傳承。
其實昨晚的《第40屆十大中文金曲－我和你音樂會》並不是沒有可看性，後半部分有香港殿堂樂隊太極、Supper Moment及Dear Jane一齊jam歌；有四大天王郭富城跳舞medley；又有樂壇校長譚與太極cross over；當然唔少得Eason陳奕迅壓軸出場唱歌。可惜前半部分的無限loop流行經典「40」年與後半形同兩個騷，想玩新舊交接又「到喉唔到肺」，過分吹奏惜日樂壇反而令年輕歌手難以得到大眾接受。
本以為商台有陳奕迅加謝霆鋒，而港台除了有陳奕迅又有郭富城再加埋校長。結果，論上年度四大樂壇頒獎典禮的娛樂性，似乎還是「叱咤」完勝。