【劉德華演唱會】粉絲排隊購票被斬 華仔：令我個心好唔舒服
撰文：洪曉璇
出版：更新：
劉德華年尾演唱會再次撳起炒飛熱潮。
今時今日睇演唱會到底有幾難？內部購票信用卡預售通通買唔到，請假去排隊仲會有自身安全危險。繼早前林俊傑粉絲排隊買演唱會門票被斬傷，今早又有劉德華粉絲，於柴灣排隊購買演唱會門票時，被人取岀利刀襲擊，事主手及耳仔受傷需要送院。劉德華得悉事件後表示心痛，親自拍片回應，希望大家注意自身安全。
柴灣發生劉華粉絲被斬案，一名內地男子受襲受傷。（賴南秋攝）
據悉，青年廣場外約兩星期前已開始有人排隊，當時約有4至5人，而排隊霸位已霸到73位。（賴南秋攝）
26號下晝華仔方面發放短片，全片長1分17秒，片中華仔表現沉重，更多次停頓語帶哽咽：「今日聽到一個好唔開心嘅消息，傷人事件令我個心好唔舒服。其實我希望，喜歡我或者支持我嘅朋友，都能夠平平安安咁去購買演唱會飛，開開心心咁嚟睇我嘅演唱會。我知道每一個有關嘅單位，佢地都花咗好多時間去諗，我亦都知道好難會有一個好完美嘅解決方法。所以喺呢段時間裡面，我地會盡量去再跟進呢件事。但係喺呢段時間，我希望警方能夠多加巡邏，保護所有嘅市民……當市民喺排隊過程裡面，如果感覺到安全有問題就要報警。我再一次希望大家喺排隊過程裡面保持冷靜，注意自己安全，你地嘅安全，就係我開開心心表演俾你地睇嘅最大動力，多謝。」