【SIS樂印姊妺‧專訪】新歌堅持不用樂器 純人聲最有創新空間
《男兒當入樽》男主角櫻木花道曾於全國大賽對上山王時，向安西教練說道：「老頭子，你最光榮的時刻是何時？全日本時代嗎？而我…就是現在了！」深信每一位音樂人也跟櫻木花道一樣，總會在音樂旅途上突然感慨：「這就是我最光榮的時刻了。」
SIS樂印姊妹作為2014年的新人，出道四周年，雖然每年也會推出新作及進行不同演出，不過兩姊妹駱胤樺及駱胤鳴對這幾年來的某些舞台時刻也特別懷念。曾經有人說過叱咤頒獎禮的新力軍金獎是糖衣毒藥，剎那光輝後，總是有得獎歌手消失得無影無蹤，就如當年得過新力軍金獎的李卓庭、Chita、Soler等也是星途不順。但對2014年得過新力軍金獎的樂印姊妹來說，雖然歌曲產量不高，但仍是一步一腳印。
攝影：黃國立
場地：香港摩天輪
Hairstylist：Daniel@Chin G
駱胤鳴MakeUp Artist：Rita Leung
四年來最難遺忘時刻 烙印：好記得自己嘅「借衫論」
其實當歌手跟做學生有點相似，不停學習的同時，成績也是一年一年結算，若果有一年得到品學兼優的獎項，算是一個加許，得不到獎項，便繼續默默耕耘。妹妹烙印憶述多年以來，最深刻還是新人那一年，在叱咤台上得獎的時刻：「當時我哋攞到『新力軍金獎』，上台嘅時候我講咗一套『借衫論』。因為做新人嘅時候，基本上係冇乜品牌願意借衫畀我哋，甚至出席頒獎禮之前，好多訪問都會問我哋準備好戰衣未，雖然我哋口講話準備好，但其實當時根本就未搵到品牌贊助。」到了頒獎禮前最後一刻，終於有人為兩姊妹度身訂造了一套戰衣。當年入行資歷尚淺，她們不解為何自己明明有努力做歌、演出，甚至連品牌活動也出席了好幾個，偏偏便是沒有人願意伸出援手。直至她們試衫時，老闆向她們說了一番話：「借唔到衫唔係同事唔肯幫你哋，而係你哋唔夠紅。」兩姊妹似是恍然大悟所以：「得獎之後，我哋對每一個願意借衫嘅品牌都好感激。」
而姐姐樂樺回想起四年來最深刻的一個時刻，原來是去年在九展舉行人生中第一個音樂會：「因為嗰一次係真真正正可以將由出道到而家嘅作品現場唱一次，其實唱Live嘅機會真係好難得，雖然我哋兩個係組合，可以一人彈結他一人彈鋼琴，但有隊Live Band一齊玩嘅感覺係唔同好多。另外聽到阿妹講起衫嘅問題，我覺得音樂會嘅衫全部都好靚，全部都係靠我哋嘅設計師去造出嚟。」
音樂人到處也是舞台 樂樺：問題係有冇好嘅觀眾
提起音樂會，樂印姊妹總是懷念當時的美好。但講起舞台的問題，近年不少人也認為，其實現時玩音樂實在到處也是舞台，在街Busking是一種舞台，到灣仔1563那類型的Live House又是一種舞台，甚至在朗豪坊唱現場也是一種舞台，對行外人來說，其實做音樂人要得到在舞台上表演的機會確實說不上困難。不過姐姐樂樺表示：「可能就係太容易有上台表演嘅機會，所以更難有好嘅觀眾。甚至你可以自發去搞一個音樂會，可能會有老闆同客戶去支持你，但有冇人嚟睇呢？所以我哋都好慶幸上年嘅音樂會有樂迷嚟睇，亦鼓勵到其他立志做音樂人嘅朋友鼓起勇氣去踏上舞台，因為咁先會有觀眾發掘到你。」
推出新歌《大聲講我知》 最緊要多謝男女主角同導演
近日SIS樂印姊妹再次有新歌派台，《大聲講我知》是繼她們去年《進擊的哈比人》後，第二首以無伴奏合唱(A Cappella)形式創作的派台歌，更與本地無伴奏合唱團Set Tone Men合作。歌曲以示愛為題：「而家新一代好似都比較羞於表達自己，所以希望用呢首歌去鼓勵大家拿出勇氣。」提起為何會堅持繼續用A Cappella形式創作，樂樺解釋：「我發現近年大家都好興用acappella嘅形式去向人示婚或者示愛，成件事都好浪漫，所以一聽到阿妹寫起呢首歌，就諗到要用A Cappella嘅方式去處理。」利用無伴奏合唱的方式造歌，其實還有一個好處：「因為廣東歌好多時候都會搵大量嘅參考，編曲做出嚟好多時都會比較死板或者一式一樣，但A Cappella喺廣東歌當中實在比較少參考，反而造出嚟會有好多創新嘅空間，容易搵到屬於自己嘅特色。」
不過除了歌曲本身要多謝監製伍卓賢老師及feature的Set Tone Men外，兩姊妹更千叮萬囑要向MV的男女主角及導演道謝：「因為今次嘅MV碌咗好多人情，包括男女主角恆仔同杜小喬，仲有導演科林。科林上次已經仗義幫我拍過一次MV，所以今次都繼續搵佢合作。而男主角恆仔就係我親自打畀佢，最初我都驚佢會拒絕，因為今次嘅主題始終都係同愛情有關，擔心恆仔女朋友小花會唔畀，點知佢喺咩都未知嘅情況底下就一口答應咗。女主角小喬就更加要多謝，因為我哋諗咗好耐都諗唔到女主角嘅適當人選，最後覺得小喬同我哋心目中嘅形象最似，所以好遲先問佢，小喬仲為咗我哋，而特登改咗佢去睇醫生嘅時間，呢樣真係令我哋非常感動。」