與DUO Band 8年情將畫上句號 陳奕迅不捨：但我哋要繼續往前行
撰文：黃浩晉
出版：更新：
陳奕迅（Eason）與DUO Band今日（26日）到中環海濱綵排，為明天的《L.O.V.E. IS L.I.V.E.》音樂會作準備。明天音樂會將於黃昏時份開始，Eason形容屆時將會是Magic Hour，望住「鹹蛋黃」吹住海風，聽住音樂，光是想像也能感受明天的氣氛。
陳奕迅今日於中環海濱綵排，為明日《L.O.V.E. IS L.I.V.E.》音樂會作最後準備。（黃國立攝）
Eason接受訪問時，表示很喜歡戶外表演場地的環境，被問到會否擔心噪音問題時，他說：「有Concert不知幾開心啦！點會有人投訴㗎？同埋黃昏6點，如果附近（上班人士）真係聽到，佢哋都開心舒服吖！唔使錢聽音樂，做得咁辛苦，鬆下先啦！」Eason早前已「暗示」過明天的歌單，共有21首歌，一半是新碟《L.O.V.E.》的作品，另一半是與之呼應的歌曲，感覺像對聯一樣。《破壞王》對《最後的嘻皮士》，《我們萬歲》對《床頭床尾》，配合DUO的精神。
+6
盧凱彤是DUO Band的一份子，Eason表示會翻唱她的《還不夠遠》：「阿妹係型㗎嘛！我會唱一首都係型嘅歌去呼應佢。」Eason又說：「遺憾嘅係，阿妹Physically唔係同我哋一齊，佢嘅精神會喺度；但我哋冇咗佢支結他，我哋冇辦法搵到另一個人去取替。新碟嘅歌佢已經做晒彈好晒，所以我哋會用返佢之前錄起咗嘅結他聲，我哋跟佢一齊玩，都係一齊玩！」
陳奕迅表示盧凱彤不可取替，明天將播出她已完成的結他音軌：「我哋一齊玩！」（黃國立攝）
Eason亦表示非常不捨DUO Band：「其實我係有好大嘅唔捨得，因為件事真係完喇！DUO呢個Project 8年喇，係唔捨得嘅，但係We must move on，我哋要繼續往前行，呢個將會係好好嘅記憶！」
陳奕迅表示，不捨長達8年的DUO計劃就此完結。（黃國立攝）