【飲食熱話】薯片撈飯唔算慘！苦中作樂網友分享最慘最窮的一餐飯

「誰都辛酸過，哪個沒有？」試問有幾多人由出世起餐餐都大魚大肉，大概有更多人經歷過高山低谷、周轉不靈、家道中落又或是長期糧尾，冇錢，想食餐好又談何容易？連登討論區有網友發帖，叫大家分享食過最窮最慘的一餐飯，更拋磚引玉先行貼出「紫菜撈飯」，卻被質疑唔夠慘，究竟其他人有幾陰公？

網民「星之卡路B」疑似食韓式紫菜撈飯時有感而發、自憐自傷冇啖好食，在連登討論區開Post問其他網民食過最窮最慘的一餐是什麼，結果大家紛紛鬥慘，還質疑樓主的紫菜飯媲美日式燒肉店「牛角」那價值$29的招牌「牛角飯」，直指樓主有飯落肚已經相當幸福。

整個Post不乏搞笑回覆，有網民貼出網絡舊圖，例如：以紙畫的雞髀拌飯，又或是將飯砌成雞鎚型，望梅止渴，算是自我安慰的一種。

按圖睇更多網友貼圖及搞笑留言。

但睇到後來居然有洋葱，越睇越慘，有網友就分享過自己窮到要食二手飯的悲慘經歷，又互相分享「窮L一日菜單」，聞者心酸，不過當中最令人心噏的，就是一位網友提到自己一家受金融海嘯重擊，窮到要賣樓，結果全家人每晚都食魚肉腸送飯，衷心希望呢位巴打依家環境有改善！