【德國生活誌】平安夜與聖誕節,應唔應該開門做生意?

撰文:陸小菲
出版:更新:

小菲隔岸觀火,一個雙十一睇住馬雲 BB 打功夫同唱歌仔的同時見住強國大業勾出所有物質主義者的兇狠心態。身邊出現無數個控制唔到自己的購物狂,不斷以刷單、購物嚟填補每日工作、生活壓力的缺口。如果話「辛苦搵嚟自在食」,小菲當然明白,但瘋狂消費除咗喺加入shopping cart與埋單的快感,到頭來又令你得到什麼?

雙十一交易額衝破 1,600 億人仔,就連包裹都以億計算;強國覺得此舉象徵發達,小菲卻只覺得係發瘟。有淘過寶的人都知道,十件衫九件伏,仲有一件會中毒,還未計包裝完全唔環保……難為一班送貨的courier哥哥派件派到手腳都軟。強國送貨員埋怨加班的同時,只好狂踢包裹洩憤,成件事害人害物。其實所謂節日,除咗消費係咪真係冇嘢好做?買完係咪真係唔再空虛?

嚟緊就係聖誕節,小菲建議大家不妨試試收心養性,控制吓自己啲獸慾。

身邊出現無數個控制唔到自己的購物狂,不斷以刷單、購物嚟填補每日工作、生活壓力的缺口。(視覺中國)

德國熱話:平安夜到底應唔應該開門做生意

德國人最近討論得最熱的其中一個話題,就係平安夜舖頭到底應唔應該開門做生意。

今年平安夜撞正星期日,而星期日商店全閂係基本慣例。25、26號就擺明係法定聖誕假期個個休息,但如果連 24 號都閂門,就即係代表一連三日冇嘢賣(其實我相信歐洲人都慣晒)。

喺香港住得咁開心的小菲,就連日本舖頭八點就閂門都覺得食完飯冇得買嘢好唔爽,想當年真係曾經好唔習慣歐洲星期日條街靜到以為世界末日。甚至當時年紀小,覺得咁樣係好唔先進;後來人大咗,先知唔先進的根本係自己。慢慢明白香港呢個硬性勞動市場,頂爛市開足七日根本做死人。

呢度法例規定星期日唔可以開門,如果商店要喺週日開門仲需要提交具體理由。雖然德國近年多咗好多Shopping Sunday(漢堡大概每年有三個左右),但德國政府仍然好惡,最多Shopping Sunday的柏林都只係得十個左右。小菲上個月就喺漢堡經歷過喇,Shopping Sunday開舖的只係一小部分,德國人星期日唔使做呢回事,已經深入民心。

不過事實德國亦有相關規定,可以畀商家喺平安夜開舖的特例——限定有賣聖誕樹的地方,花舖同埋超級市場可以開門做生意;至少等啲情人急起上嚟,都可以喺超市買啲朱古力食吓。只係大部分商家都唔用咁解啫。係呀,佢地真係傾向有錢都唔賺呀。

德國亦有相關規定,可以畀商家喺平安夜開舖的特例——限定有賣聖誕樹的地方,花舖同埋超級市場可以開門做生意。(視覺中國)

「你地返歸啦唔好買嘢,聖誕節畀人抖吓啦」

聖誕節前夕簡直係香港的黃金檔期,你唔買都大把同志好神心咁走落嚟買到反晒艇咁上返去。香港舖租炒到咁貴,唔開?你係咪傻架。

但小菲睇德國新聞已經見到報導指大型超市6間有4間決定全線唔開,2間因為係外放加盟店的關係交返畀各自領導人決定,不過報紙都寫咗大部分都已經決定唔開門。德國服務業公會更開到聲叫大家唔好買嘢!24號平安夜希望所有消費者可以放過商店員工,大家開開心心返屋企準備過節的慶祝。星期日都要人返工呢啲咁殘忍的事,唔好畀佢發生。

唔使擔心市民會鼓燥喇,因為民意調查已經出埋,有超過80%人認為星期日的平安夜係唔應該開門做生意,更有超過70%人覺得「絕對唔應該開門」。小菲喺呢度都想大家停一停,諗一諗:係咪係時候可以學吓人享受節日/假期,選擇同重要的人一齊過而唔好為咗購物/禮物而身心勞碌。共勉之。

(本文純屬作者意見,不代表香港01立場。)