2007年，人民幣幣值首次正式超出港元，100港元只能兌換大約99蚊人仔，習慣在東莞常平一帶消費嘅一眾香港麻甩佬，從此再無返大陸食野消費平靚正呢支歌仔唱！但作為具備長遠戰略眼光嘅我，一早又怎會將目標放在俱俱珠三角之地？我對神州嘅眼光，已落在更遠嘅地方！

這一年年頭，我認識了我人生第二個漂族女友，來自上海嘅小英。

有東方巴黎之稱嘅上海，雖然無巴黎數世紀嘅歷史洗禮，但作為《南京條約》後與西方資本主義接軌嘅港口城市，百年來深受西方文明洗禮同埋薰陶，深具海派文化嘅獨特個性。如同巴黎女人有別與歐美其他洋妞一樣，上海妹同亞洲其他女仔相比，無日本妹個種拘緊、韓國妹個份成熟、東北妹個種開朗、廣州個種草根味，上海妹，有海派嘅雅緻，大都市嘅時尚，別具小資情調。

同Suki散左之後嘅第二個月第三日，我走去同朋友食甜品。我第一次遇到小英。

我對小英嘅印象，至今只有佢個片透氣又紅潤嘅雙唇。

小英是我朋友嘅朋友，個日係甜品店初相識，我至今仍記得小英淺嘗雪榚時，軟舌一捲，在唇邊一滑嘅情景。

個片紅唇令我錯覺係粒櫻桃放左係鼻下。盯著佢嘅雙唇，經常會挑起我嘅欲望。

事後令我諗返，我特別記得小英雙唇，除左因為第一日識佢呢一幕外，佢仲好鐘意食提子霖酒雪榚，佢好鍾意每次食食下個陣，就雙唇微合，享受個份寒意係齒間的流動感，有時佢會伸出軟舌，軟軟咁捲去唇邊個份遺留下嘅寒意，然後微微合上眼，享受那短暫快感。

小英係一位適應力極強嘅上海女孩，來港只有短短四年，大學中途理科轉文科，一畢業嘅佢不但再聽唔到鄉音，仲係來港呢幾年間學得一口流利法文。

我係點樣溝到小英？話說小英畢業後係一間旅行社工作，可惜小英一直唔喜歡呢份工作，覺得鬱鬱不得志，就係佢呢個失落嘅時間，我開解佢、關心佢......同佢一齊周圍行，最記得係一齊去當年就拆嘅牛頭角下村食小食同影相。結果有次大家一齊係老蘭飲酒，佢飲大左，咀左埋我個咀度，就咁開始左。

所以，我係記憶深處，亦總係對佢雙唇揮之不去，餘溫現在仍猶在唇邊。

王家衛講過：上海女人好複雜。

細過個陣睇《富貴迫人》，上海婆肥肥個種大女人巴辣老婆嫁著小男友董鏢，正好係小英一家嘅呈現。深受西方文化影響的上海，男女較平等，令到連龍應台都要話上海男人「可愛」、溫柔而坦蕩。可能多得伯母所賜，小英都係個仲佔有慾好強嘅女人。但我想講，我係湖北佬，唔係上海男人！

小英如一般上海妹，吳儂軟語，聲線柔和，愛看宋冬嘅畫，聽內地嘅痛仰樂隊。不過，當佔有都係以溫柔為包裝，你未必定得順！

我好鐘意睇歐冠盃，但係我睇親波個陣，就會收到小英嘅短訊或電話─「我想食雪榚」喂！大佬，做乜呀夜晚食雪榚？一次半次，我都會幫佢去買，但係我最唔接受到，係佢襯我唔覺時查我手機短訊，但扮無野，俾我有次唔覺意發現到。

皇后碼頭最深刻

最刻骨銘心嘅一刻，發生係皇后碼頭。

某日我地係大會堂睇完話劇，走去皇后碼頭吹吹風。夜幕低垂，八九點嘅碼頭，數盞微黃青燈映照住「皇后碼頭」四字，令碼頭仿如一盞亮燈係暗黑中環嘅一角發亮。碼頭環境寧謐、夜景醉人、海風吹送、浪頭往服，令人非常舒服。突然，佢撇開同我拖住個隻手，同我煞有介事咁保持距離，離遠有個鬼佬行黎，同佢打招呼傾計，一睇就知佢地識。

最後點解咁，我唔想再解畫，睇到呢度大家都估到一二，總之，我不敵老外、洋腸。

我與小英嘅感情，亦好似皇后碼頭個年年中咁，成為大家嘅歷史回憶！

後記：小英最近透過Wechat搵返我，但佢唔係用自己頭像，我一時間諗唔到係邊個。我問佢係乜水，佢無端端鬧我話我唔念舊唔識人。

王家衛講得好岩：上海女人好複雜。

（文章純屬作者意見，不代表香港01立場。）