我無俊俏嘅面孔，亦無堅硬嘅胸肌，但我有持久力！個剎那腦內響起一聲，係深圳泵骨時內地服務員用唔鹹唔淡嘅廣東話叫「先生，舒唔舒服？」個把聲，當堂打左個冷震！尤其係文青女，唔好鋪鋪諗住有快餐，總之，講持久力！

與小英分開後，跟住拍過一兩次拖，但就好似阿仙奴咁，賽季開波就係威係勢，但一到二月就乜都唔係，有頭威無尾陣，無謂講啦！

不過，係08年呢年間，發生左啲小插曲，令我對識女仔的方法論上別有一番體會。

係度都想講下，早排識左一位九十後，佢十分俊俏，身邊女伴成日轉黎轉去，但係每次同女友分手，就好快反目；或者追女個陣獻百般殷懃，但當知道個女仔有男友，或者對方請佢食檸檬，佢就好快一百八十度大轉變唔識人，unfriend埋個女仔。

做左幾十年人，我同上面講個位後生仔好唔同，我無俊俏嘅面孔，亦無堅硬嘅胸肌(唔好俾我張博客Icon自High圖呃左)，但我有持久力！

我覺得，與人認識係一種緣份，志趣相投，有緣可以做情侶，無緣亦係好友。毒撚成日有一種極端悲觀主義，唔相信主觀能動性，放棄任何努力，唔踏出第一步；但另外有一種係極端樂觀主義，幻想存在速成法，要好快省力咁追到女。但我話你知，好多時人與人關係係「浸」出黎，而且，你與人認識嘅第一步，你未必知道佢將來會係你女友或者老婆，而且有時女性朋友會係介紹返最多女性朋友俾你。所以，珍惜每一段因緣際會，記住「莫道你在選擇人，人亦能選擇你。」

毛澤東《論持久戰》話齋：「 敵進我退，敵退我追。」

2008年，我和祁壹第一次通信。

話說小弟係北京讀書時係讀哲學，都叫做半個文青，因為係大學時對哲學嘅渴求，所以係學校都有啲名氣，所以一位當年係北京讀書時認識嘅朋友Rebecca，介紹左一位佢中學師妹我識，佢就係祁壹。當年祁壹身在上海，對哲學有濃厚興趣，並攻讀文化課程，因此佢師姐馬上醒起我，就轉介俾大家認識。如是者，我同祁壹展開左漫長嘅書信交流。

個年頭，Facebook剛流行，當年仲係內地上到架，但我有用而佢無用！當時又未有Wechat同Whatsapp，所以我地用當時已經用最先進最普及嘅電郵來通訊。雖然無左青燈黃紙，掩卷遐思個份浪漫，但每晚返到屋企，我都好急不及待打開電腦，等待祁壹來信。

記得佢第一封信開頭係咁寫：

「先生你好，我作此書時，適從學長那兒知道您能撥冗解答晚輩的提問，甚是欣喜…」

回憶深圳泵骨情景

嘩~咁文皺皺嘅，「先生」？佢當我老師？定係大家唔熟佢客氣叫聲我阿生？個剎那腦內響起一聲，係深圳泵骨時內地服務員用唔鹹唔淡嘅廣東話叫「先生，舒唔舒服？」個把聲，當堂打左個冷震！咁我係咪要回佢「小姐」？不過，後來知道係我中文唔好，原來呢個「先生」，係古代漢語對有學問嘅人尊稱，成頂高帽戴上黎，中文本身唔係太過好嘅我，假假地都係知識份子，點都扮下野(保持形象呀嘛！)祁壹嘅問題有趣而具深度，我起初都反應麻麻，但同佢講講下就越黎越興奮過癮，所以每次回郵，我都查曬書逐粒字小心打，打完又再小心校對，萬無一失先按「傳送」寄出去。

祁壹問嘅問題一啲都唔簡單，由拉康、精神分析、文學理論，去到阮玲玉電影、張愛玲小說乜都講。小弟依家有時識得吹兩咀張愛玲，唔多唔少拜當時查書所賜！如是者我與祁壹鴻雁傳書，大家交心論學，但就從未謀面。

堅守八字方針

同女仔搭訕，我堅守我嘅八字方針：「簡單、直接、真誠、禮貌。」如是者，我唔多唔少打動左祁壹，贏得佢稱呼我係一位「可以真正做自己老師」嘅美譽，她稱讚我地嘅書信係真誠對話。

問心個句，當時我同祁壹通信，真係諗住同一個欣賞我才學嘅人吹下水，無諗過溝人。但後來同佢嘅發展，令我認識到，好多時關係係「浸」出黎，尤其係文青女，唔好鋪鋪諗住有快餐，總之，講持久力！

2009年某日，Rebecca係中環藝穗會攪畫展，祁壹會黎開幕禮，我地終於有機會見面。

（本文純屬作者意見，不代表香港01立場。）