【中國上的舌尖】滷味當飯食：食在台灣

我同佟佟前後拍拖唔夠兩年，除左前後有四個月佢出埠工作外，我用盡哂啲年假咁濟，每個月都盡量抽一個禮拜去台北，我同佢前後拍拖差唔多兩年，由於大家主要話題都係「食」，所以都算見盡台灣大小美食。台北食的文化真係多姿多采，我最記得Buffet(香港嘅自助餐)佢地會叫「吃到飽」，連飲茶都有「吃到飽」點餐服務。係香港Häagen-Dazs雪榚叫貴價野嘅話，係台灣Häagen-Dazs好多時係好多舖頭「吃到飽」套餐都係任食。若果話Häagen-Dazs係好野，係台北個陣有隻當時剛引入嘅俄羅斯雪榚「卡比索」，真係好好食，但呢隻雪榚到依家係香港好似唔係好覺有得賣。香港近幾年先流行台式茶座，便利店飲品先有較多選擇，但係台北並通飲品品牌，都有N款口味。

香港台式小食未得精髓

係台北個陣，我好好彩無食過牛歡喜之類嘅菜，但好深刻食鴨血榚。其實平時我個人已對豬紅之類已經麻麻喜歡，但未致於唔食。但係，台灣人好興搵啲糯米同豬、鴨、雞之類嘅血撈埋一齊做榚點。我地香港人打邊爐鍾意食丸呀、山根之類，台灣火鍋就鍾意食鴨血榚，我個人覺得口感好怪，隻榚又未去到年榚咁黏牙，但又有糯米黏住哂個口，腥腥地。另外係台灣人好鍾意滷味當飯食，有凍滷味同熱滷味，熱滷味就將條滷味淥一淥俾你食，佢地鍾意加

啲杏鮑菇整落啲老滷、火鍋、鹽穌雞到。我最頂唔到係食番石榴，佢地叫「芭樂」，我係香港同北京都未試過加啲鹹味調味料落生果度(後來聽返黎話南方水果品種較多，潮汕一帶有類似食法但我未試過)，但台灣人食芭樂就好鍾意加梅粉，個種甜中帶鹹鹹酸酸嘅味，我覺得怪怪地，但喜歡食嘅人話咁會更帶出水果嘅甜味。我個人覺得，兩岸三地去均哂，台灣的小食我真係唔係好理解，因為源於我食唔慣姐。香港人依家係香港食到嘅台灣菜，真係未得真髓。溝得台妹，各位預左要陪佢食各樣你係香港生活唔太食得慣嘅野。

俾多個貼士各位讀者，若果你諗住簡簡單單，去到食牛肉湯麵無事啦！記住呀，牛肉湯麵係指個湯底用牛肉餚，碗麵無牛肉架！要食有牛肉做配菜嘅麵，叫「牛肉麵」。

充滿正義感嘅女友

佟佟個名源於佢姓佟，祖籍滿洲，你可以話佢係滿清後裔。佟佟係八十後，同我地平時認識的嬌滴滴嘅台妹好唔同，佟佟係個好英氣嘅女孩，個子高挑，所以帶點帥氣。由於佢爸爸係外省人，媽媽係閩南人，自小住坪東，所以自細被人揶揄佢係地瓜(本土)芋頭(外省)混種，俾本省人排斥。我地識無耐佢就帶我見佢家人，因為佢父母好早離異，佢跟佢媽媽住，所以我只係見過伯母，而伯母都對我好好。