今日娛樂圈最爆嘅新聞莫過於阿Sa蔡卓妍嘅新戀情曝光，香港人就最八卦㗎喇，最鍾意睇邊個同邊個拍拖，又或者邊個同邊個分手。有時又好難怪嘅，因為有時候明星嘅花邊新聞仲好睇過依家TVB八點半啲連續劇。就好似阿Sa咁，嗰陣時佢同鄭中基傳緋聞，傳咗好耐到佢哋離婚開記者會，先知佢哋唔係緋聞竟然係堅料。之後唔知係公司宣傳定日久生情，阿Sa同陳偉霆高調拍拖，但大家又彈William唔夠紅搵錢少，連黃曉明都串佢話：「我不認識陳偉霆是誰」，喺大家咁唔睇好嘅情況之下，最後佢哋就當然分咗手啦。之後阿Sa就好似空窗好耐冇拍過拖，今次佢畀影到去豪宅過夜，原來佢依家個麻將館太子爺男友竟然係連詩雅個前度，成件事真係好Juicy，仲好睇過《愛．回家》！

唔講真係唔覺阿Sa已經35歲，個樣都仲好呃得下人！

你以為就咁就完，未完啊！我一次過講晒你聽，阿Sa個男友係麻將館太子爺；麻將館太子爺前度係連詩雅，連詩雅又傳佢力追Mark Ngai，Mark Ngai係邊個？佢係阿G.E.M.（鄧紫棋）個現任男友，又係JW（王灝兒）個前任男友，而阿G.E.M.同JW竟然係識咗10年嘅閨蜜，好亂啊真係！（詳情請看下面人物關係圖）

唔知大家有冇睇過美劇《Gossip Girl》（TVB翻譯：《花邊教主》），佢哋就好似呢套劇嘅現實版咁，人物關係錯綜複雜，真係亂過亂世佳人！其實唔止佢哋，好似近年幸福滿瀉嘅胡杏兒咁，佢個老公係佢個姊妹團「胡說八道會」入面李施嬅個EX嚟，結婚嗰日杏兒仲請埋佢做姊妹，不得不大讚杏兒好大方又好大膽，如果好似陳奕迅唱咁：「想過搶新『郎』我差點講真」，咁就真係大件事喇！

其實娛樂圈大家嘅感情交友圈子係咪咁細呢，點解大家拍拖嘅對象好似嚟嚟去去都係嗰幾個咁，明星成日周圍飛，去唔同國家做活動拍廣告開演唱會，應該交友好廣㗎，又會咁世界真細小喺同一個娛樂圈到「撞男友」嘅。

香港雖然話係國際大都會，要識兩文三語，又主張要「Critical Thinking（批判性思考）」，但講到男女感情呢方面就好鬼保守，好似之前盧凱彤拎金曲獎出櫃多謝佢老婆，網民個個留言話佢標奇立異唔知醜。喺感情上，中國人最忌就係「戴綠帽」同埋「著舊鞋」，阿Sa同阿G.E.M.、杏兒應該拍拖之前都知男友個EX係邊個，唔通佢哋真係唔介意？

Mark Ngai咁多人搶，唔通佢真係好靚仔？

女仔其實最終都係想搵個好歸宿，一個可靠嘅男人照顧自己嘅下半生，但女明星出騷開個演唱會下下都賺6、7位數字，真係唔係個個男人可以比得上，雖然依家唔係古代社會要求「竹門對竹門，木門對木門」，不過女仔自己搵得到咁上下錢，都想搵個男仔唔一定要求賺得比自己多，但最少同自己差唔多搵錢能力啊，如果唔係另一半畀人話「食軟飯」都幾大壓力。你睇張繼聰同謝安琪，阿聰被人笑佢係「謝繼聰」好多年，好彩最尾佢都爭氣捱出頭。你可能話咁樣諗係好「港女」，但其實呢件事好「貼地」，有邊個女仔唔想畀人照顧，有錯咩？

只可以感嘆圈外嘅荀盤真係太少，可能因為需求多於供應，所以佢哋咪「撞晒男友」咁囉。