在拳擊界保持着49場不敗全勝的梅韋特（Floyd Mayweather），以及UFC雙料世界拳王麥佳格（Conor McGregor），已經公布將會進行一場世紀之戰。屆時將會以職業拳擊規例進行比賽，體重在154磅和配戴10安士拳套，進行12回合的對決。這一場大戰引起拳擊界以及MMA界熱烈討論，在TVB擔任演員兼武術顧問的武術家李嘉都有留意到這場賽事，不過他對該拳賽並沒有什麼大興趣，更直言這只是一個以商業為主的賽事。

在接受《香港01》訪問時，李嘉說：「其實我覺得這場賽事根本是一場雞同狗的對決，鬥雞同鬥狗，睇你將雞同狗擺埋一齊，睇吓邊個贏囉。我自己覺得這場賽事太過商業，大家都知道近幾年MMA個走勢好勁，其實西方社會咁多年嚟都係以拳擊作為體育競技同埋博彩，自從MMA近這十幾年開始在西方社會流行，拳擊是受到好大衝擊。變咗以商業角度嚟講，如果MMA想繼續發展落去，必定要喺拳擊市場方面搶fans同觀眾。佢地兩個這場比賽，我覺得商業意義濃厚過真係武術格鬥，因為如果真係要格鬥係唔需要掛拳擊或者MMA。」拳擊賽近年經常出現打黑拳等等的情況已非新鮮事，所以李嘉這樣推測的確不是無的放矢。

雖然提到背後有其他因素操控，但如果兩個人真打上來，被看低一線的McGregor又能夠捱到多久呢？他說：「至於能夠捱到幾多個回合就唔到我講喇，因為好多時候拳賽嘅勝負唔一定係拳手嘅技術話事，可能都係一個商業嘅操控，例如係捱幾個回合，喺邊個回合出現一啲戲劇性嘅發展。我覺得係一場show，真係一場show嚟。點解我會咁講呢？因為只要你有錢，好似中國有個有錢人，都可以請到播求（泰國拳王，2屆K-1世界冠軍）嚟同佢比賽，你諗到其實呢個擂台嘅遊戲始終都係會同錢銀掛勾。講到一場戲呢樣嘢，泰臣都已經退咗役喇，但係為咗錢都上咗銀幕同詠春較量。你覺得如果當打時候嘅泰臣，出一場拳賽有幾千萬美金嘅，你覺得佢會唔會睬你甄子丹拍《葉問》呀？仲要俾葉問打到唔知點咁，所以啲嘢好多時都係向錢看，唔係武術家所為，搏擊運動員都有一套佢地生存嘅模式。」看來在李嘉心中，這正大鑼大鼓的拳擊賽事已經被金錢操控着，畢業拳擊手也需要搵錢。

那麼為什麼他不喜歡觀看這種賽事呢？他說：「我係好鍾意拳擊嘅，因為我覺得拳擊作為一項觀賞又好，作男人之間嘅對決又好，純粹以男人同男人之間嘅公平較量，用智力同體力，又唔使好似功夫咁吓吓攞人命，其實係好好睇嘅。但係MMA我就唔係咁鍾意，因為佢嘅打法會令到練習嘅人嘅獸性勾咗出嚟，因為你將個對手打到瞓喺度，你仲要騎上去繼續打佢，打到佢頭破血流，或者裁判將佢地分開。呢樣嘢已經唔係純粹體育競技，你話佢係咪真正武術功夫，又唔係喎，因為MMA都有佢嘅規則，但佢又要做到好血腥好殘忍嘅感覺，就係為咗吸引多啲觀眾。如果我係拳擊手或者我係教練，我唔會叫我嘅拳擊手參加呢類比賽，因為唔係同一個範疇。」除了MMA之外，其實還有很多觀賞性高的賽事，他指出了拳擊、泰拳、相撲都是他會看的運動，「我就好少睇MMA、UFC呢啲賽事，因為我本身都冇乜興趣。拳擊、泰拳、相撲我會睇，但MMA真係無，因為佢地個打法各樣嘢，如果你從一個技術角度去睇，佢地唔係無技術，係有嘅，但係你因為拳頭唔夠拳擊手勁先要用腳加摔加地墊，就係因為摔跤唔夠摔跤勁，所以要加拳腳，MMA係屬於一種各方面技術，都唔夠精煉先要搞綜合格鬥，所以我自己就無睇。」

今次McGregor改用拳擊例去跟專業拳擊手打，會否很輸蝕？李嘉認為：「如果McGregor用拳擊例去同拳擊手打，我覺得背後酬金都真係幾吸引先會咁做，同埋佢對自己都有好大嘅信心，佢應該搵到方法點樣去打Mayweather先會敢接呢場賽事。如果佢咁打，其實佢無俾人KO，已經算係贏咗喇。因為佢打MMA架嘛，佢用拳擊例去同個拳擊手打，只要佢捱到，我覺得佢已經贏咗。」的確，要一個打開MMA賽例的人去打拳擊賽例其實已經有好大的差別，有勇氣參賽而且捱到最後的確已經算是很大的勝利了。