顏國樑逝世｜當年盛傳與無綫不歡而散　顏國樑稱遭人散播謠言

資深演員顏國樑今日（26日）傳出死訊，鄧英敏接受傳媒訪問時證實好友於昨晚11時多在醫院離世，享年71歲。

顏國樑演活過不少「小人物」角色，《香港八一至香港八六系列》的陳積、《季節》的大Dee、《真情》的陳大勝、《十月初五的月光》的全海景，以及《皆大歡喜》的石大川，都是他的經典之作。

顏國樑早兩年驚喜現身無綫台慶，勾起不少觀眾的集體回憶，但其實一直有傳他於2008年約滿無綫電視後，雙方是不歡而散。事隔多年，顏國樑在接受鄧英敏網上節目訪問時，也曾對此傳言作出解說。

顏國樑自演在無綫向來都是很低調，沒有什麼新聞，而當時與無綫的合約的確是就快到期，適逢有個內家拳裁判訓練班，他的師傅提議他去考，於是他便向當時《烈火雄心3》劇組助理申請每星期2小時去上堂，「跟住佢話咁呀？你上少堂得唔得架？我話最後就唔好啦，因為我上少堂唔畀證書我就浪費咗，就係咁樣之嘛。」

點知就出事了，事隔一、兩個月從徐遇安口中得知有人散播謠言說他完約後便立即走人，剩低未拍都不拍了，但他沒有這樣講過，也從不是這種人，「所以我聽到都𢱑頭，我問佢點解會咁架？佢話出面係咁傳，所以阿姐叫我問你。」顏國樑稱更離譜的是藝員調配組在電話中豪不客氣地跟他說：「佢話顏國樑，你仲有啲手尾未拍完個喎，好嚟好去，你就快約滿了，但唔好合約完就走咗去！」即時令他「起火」不開心其實他當時手頭上還只剩下一場戲未拍，還有一個多月才約滿，但他等了兩個多星期仍未收到拍攝通告，「我同返佢講，依家嘅情形係你冇畀通告我，我喺度等，我話我仲有成個月合約，點解唔搵我開工呢？對方竟回覆一句『吓？係咩？』之後過咗兩日咪收到通告囉，完成所有拍攝。」

顏國樑直言此事件令他非常不舒服及心灰意冷，覺得如果繼續做下去，他要工作一定會去「敲門」，「但有啲人憎人富貴厭人貧，我又冇得罪你，我返工除咗攞條佛珠鍊念經，都唔多講嘢，既然此地不留人，亦有留人處。」故合约一到便走人。