一連兩日舉行嘅《Waterbomb Hong Kong》，首日喺風球「馬力斯」襲港下，即遭觀眾怒轟安排混亂　入場等兩小時、散場冒雨攞袋再等四小時，大會發聲明致歉。音樂節第二日（2日），入場明顯順暢，而完騷時，觀眾離場亦未見有「塞車」狀況。

晚上去8時許，身材火辣嘅Jessi上場，以DeepV泳裝配白色短裙，獻唱期間不時扭pat、大派飛吻，又以英文同香港觀眾打招呼，又指今日天氣十分好，不時提醒大家要飲水，最好笑台下有fans舉牌「姐姐，請講X你」，Jessi講完之後問大家呢句是否粗口。

Rain壓軸出場，唱到第二首歌《Hip Song》時已除去上衣大騷肌肉，Rain表示十分開心與大家見面，之後表示有好消息要宣布：「我7月要喺香港舉行演唱會」之後一口氣唱出《Rainism》、《It’s Raining》、《30 Sexy》等經典歌曲，最後再Encore《I Do》才依依不捨返回後台。