【宋仲基宋慧喬結婚．任噏亂評】 最痴心宋太　最心碎的終極FF

7年嚟我嘅電話屏幕同lockscreen永遠是仲基oppa，直到現在都無變過，每朝一起身就會同屏幕講早晨。到lunch自己坐在摩天輪下面食飯盒時，就會開呢嗰屏幕，立即會感受到被浪漫包圍。好可惜，當時oppa係香港唔多人識......身邊每個人都只當佢係一名韓國「路人甲」。而一去到星期六、日宅在家中，當然要煲下oppa嘅劇集同電影，尤其係套《霜花店》，就算有趙寅成全裸，但這些都不是重點，因為重點係睇仲基oppa，雖然出鏡率唔多，但我已經熟到知佢係邊一分邊一秒出現。

2013年，oppa係事業起飛嘅時候選擇去當兵，履行國家義務做真男人，雖然會有2年時間見唔到佢，但唔緊要㗎！我知道時間好快過。每個人都話男演員當完兵，人氣一定會插水，好慶幸仲基oppa唔係被選中嘅人，2015年5月退伍後，知道你接拍了金銀淑嘅《太陽的後裔》，而對手係宋慧喬，雖然喬妹一向好易同男主角有緋聞，但我知道拍了這劇你一定會紅，為了oppa的前途，我毫不介意，因為好想見到你再次成功。結果，你立即成為炙手可熱嘅韓流明星，我當時真係好似中六合彩咁開心。Even去到外國旅行（ps唔係韓國ok？），見到周圍嘅海報都係oppa！最開心嘅一定係年尾KBS演技大賞，因為仲基獲得最勁嘅大賞獎，我即刻係屋企開心到尖叫「呀！」……係台下嘅我…唔係，係香港嘅我真係開心到喊，但嗰刻，我知道…我哋距離已經愈來愈遠……

要知道當年套劇紅嘅程度，係紅到網上有好多俾你扮宋慧喬嘅服裝賣，我全部都有買，希望可以變成姜暮煙。還記得仲基oppa上年6月仲首次到香港舉行fans meeting，日子係6月11日！賣飛當日當然要準時10點撲飛，好記得網頁癱瘓成個鐘，但我唔係容易放棄嘅人！F5了一小時，終於俾我買到！10號就去機場等你，苦練７年的韓文終於有機會用得著，我喺機場叫到失聲，「중기오빠 사랑해（仲基OPPA，我愛你）」、「홍콩까지 와주셔서 감사해요. （多謝你肯嚟香港呀）」、「영원히 응원해줄게, 화이팅! （會永遠支持你，加油！）」，我知你喺聽到嘅，等3個鐘見到你10秒，我覺得上天真係對我不薄。

6月11日到喇，開心嘅時刻係過得特別快。去年10月，oppa同宋慧喬被影到疑似拍拖，做fans嘅我見到第一時間就不斷同自己講：「係幻覺嚟！嚇我唔到嘅！」，好快兩位當事人就否認，當下先無咁情緒失控。

但不認不認還須認，係7月5日即係今日，二人首度承認戀情後並宣佈10月結婚，做fans嘅真係要有強心臟先負荷到。雙宋結婚一出，有好多粉絲都話oppa瞞婚好傷心之餘，又話覺得被oppa欺騙感情......。

現實是殘酷的，又一證明偶像與粉絲係有距離，各位做唔到真「宋太」都唔緊要，我覺得做fans應該要祝福偶像，雖然要割愛係好崩潰嘅事。所以由今日起，我決定開始撲特價機票，10月31日決定飛去韓國見證oppa婚禮...更準備上演一幕「搶夫」！OPPA ！你要等我呀……（FF完）