少女旺中付按金試衫疑受騙？　陳潔玲：婚紗先聽過試衫費

到旺中（旺角中心）買衫，基本上是70、80、90後的集體回憶，皆因讀書時期，消費能力有限，但幾百元就要裝身見人，扮靚拍拖，旺中無疑是不錯選擇。不過近日有女學生（聲稱是朋友經歷）開post，怒斥在旺中買衫誤入黑店，雖然最後只是損失2百元，但錢銀數目事少，條氣就頂到上心口，所以叫大家不要中伏，竟然一石激起千重浪，有不少網民留言，表示自己也有相同經歷。

女事主原來是準備去Grad Din（謝師宴），所以到旺中置裝買裙，去到其中一間店舖，店主即拎了5款裙給事主，但同時要事主先付200元及學生證，在試衫前事主已問明試過不合心水，是否有得退款？但店主卻不置可否，反說店內有幾千條裙總會揀到。之後就出事啦，事主試完裙後，想取回按金，才知道「不設退款」，其後店主游說事主揀條便宜點的裙，再退回差價，但當事主揀了一條99元的裙子後，店主又反口話叫事主再揀多樣貨品，講到尾又是不肯退錢，事件最後要報警處理。最終事主無幫襯，但亦未獲退款，在無可奈何下，只得上網揭發事件，希望不要再有其他受害人。

旺中試衫先付按金事件原文：

事件誰是誰非，至今仍未有定案，而前無綫藝人陳潔玲，離巢後發展自己的婚紗店生意，讀書時期亦有到過旺中買衫的她，說確是未聽過試衫要先付按金，她接受《香港01》訪問表示，「要先俾按金真係未聽過喎，除非係高檔少少，例如婚紗、晚裝咁，但那些是試衫費，會一早講到明，唔會試完晒突然收錢。讀書嘅時候都有去過旺中，以我所認知，那個地方消費唔係好高，一般都係幾百蚊之內。（有何建議給事主？） 如果係我連試衫嚿錢都唔會俾囉，依家件事咁多人講，大家都要有個警覺性係度。你諗下成件事嘅消費都係幾百蚊，點解要搞到先俾按金咁複雜呢？」

不過陳潔玲亦表示如果是婚紗店，就會需要試衫費，「出邊有啲婚紗舖頭都會有試衫費嘅，始終婚紗驚有損耗，而且你自己一個人，係著唔到件婚紗㗎嘛，要安排人手幫你，咁都係資源嚟嘅。但業界嚟講，一般個客人俾完試衫費，如果佢之後幫襯返，都會係張單度扣返嘅，變咗係唔使俾試衫費，而且會一早講到明。」其實對學生來說，幾百元可能已是一星期的零用錢，若然不幸遇上不法商人，又確是有苦自己知，現在「經一事，長一智」，希望同類事件不要再發生在年青人身上。