【天地豪情】扮絕症病人攪到爛頭 姚瑩瑩:Apple係完美女友
《妙手仁心III》之後，緊接《天地豪情》，雖然已是第三次重播，不過網友都寧願捱眼訓追睇，這套98年作品，前晚播第一集，大家的回憶返哂嚟，除了全盛時期的羅嘉良，最令網友懷令的是姚瑩瑩，劇中飾演Apple，現在完美女友是唐詩詠，但19年前的代表是Apple，劇中為大頭文還錢，Apple不拿了老豆的屋契，之後身患絕症為扮移情別戀，成全大頭文同Abby(郭藹明飾)，為男友可以做這種事，這類好女友無論幾多年後都是完美，姚瑩瑩接受《香港01》訪問，亦覺得Apple偉大，她說:「嗰陣未有internet，有啲fans寫信話我知，話同男友一齊睇到喊，仲話見到自己男友對住Apple喊，都唔會呷醋，因為Apple真係好慘，我真係估唔到嗰角色咁大迴響，嗰陣Apple係男仔嘅完美女友嚟㗎，個個都想追Apple，因為Apple性格太好。」
重播19年前作品，姚瑩瑩最懷念是身材，她說:「睇返最掛住自己嘅身材，哈哈，嗰場咀撈家嘅戲，好似係一落機即拍，我嗰陣乜都唔知，未培養感情就嚟㗎喇，我仲記得導演同我一齊睇帶，「瑩瑩，睇下妳自己，好似撈家強吻妳呀，嗰角色講妳好鍾意佢㗎!」不過嗰陣自己好新乜都唔識，撈家好好人，佢叫我唔好緊張，唔好死記的對白，要消化佢做戲先自然。(現實中的妳似Apple嗎?)我?我似啩，如果唔係監製戚其義唔會揾我啦，哈哈，」
劇中Apple不止是好女友，更令人難忘，是她的結局很淒涼，劇中血癌離世，原來拍攝時亦非常辛苦，她說:「我死嗰場都好慘㗎，因為拍幾日都拍唔到，哈哈，因為拍廠景over，我黐咗幾似波膽(扮光頭專用頭套)，我個頭要搽膠水，但原來我個頭對啲膠水敏感，每次黐完都發炎，紅哂，好似爛頭咁，後尾等咗幾日都拍唔到，我記得好似係撈家同劇組講，「唔好再甩瑩瑩呢場戲啦，佢日日都爛頭咁樣，睇下拍唔拍到佢先啦。」
《天地豪情》是姚瑩瑩的代表作，但她暫時不會和兒子Evan一齊睇，她說:「佢朝早要上堂，所以未睇，不過都要陪住佢睇，我費事佢太混亂，原來佢以為KC係我新男友，有次我拍完《開心速遞》，攞咗紮道具花返屋企，擺咗紮花喺枱，之後我個仔走去同工人講，「我知紮花邊個送俾媽咪喇!係佢新男友KC」笑死我，原來佢成日自己睇mytv super，睇我做《開心速遞》，所以我要陪佢睇《天地豪情》，我真係驚佢以為大頭文又係我新男友，不過佢可能未必認得我啦，我嗰陣時咁瘦，哈哈。」