以香港人的習慣，網路電影一向都是不被重視的(甚至忽視)。而然巨門娛樂近期卻專心籌備製作《奪命追兇》一戲，更加邀請到有「師幻殺手」之稱的吳啟華擔正演出心理醫生一角。除了吳啟華之外，更加有朱慧敏、李雨陽、李思欣、程芷渝、杜大偉等參與演出。

其實呢次吳啟華又係飾演醫生嘅角色，其實怕唔怕同以前角色重覆呢?他接受《香港01》訪問時回應：「你話同以前會唔會類似吖，我覺得肯定會㗎啦。我作為一個演員就唔諗咁多以前嘅嘢。當我每接到一個角色，我會諗嗰個角色係一個點樣嘅人，去重新塑造一個生動嘅生命出嚟。至於個角色似唔似程至美，或者之前嘅角色，我就控制唔到啦。我就唔會諗咁多。」嗱，呢啲咪叫做專業囉，每個角色都當係一個生命去看待又會去諗點樣演法。不過我哋嘅程至美醫生似乎又唔係好抗拒繼續演醫生嘅角色：「吳啟華始終都係吳啟華，佢又冇整過容。都係著套西裝戴副眼鏡，斯斯文文咁做個醫生。」咁㗎，唔通宜家搵吳啟華去演變態殺手咩…

另外已經離巢發展嘅朱慧敏接受《香港01》訪問時就講到呢次拍戲係收開心價，仲話拍戲唔係主要為錢添：「其實我對工作同演戲都好有熱誠，所以唔係只係睇錢囉。拍呢套戲主要都係因為劇本同角色好。你問我嘅話，例如做MC或者商演價錢都唔係低，但係相對地舒服，又唔使好似拍劇拍戲咁日曬雨淋就已經有個好唔錯嘅演出費。但係拍戲對於我嚟講就真係為咗個「熱誠」，所以我拍戲唔係下下都為錢囉。」