TVB節目《中年好聲音》推出以來引起勁大迴響，令一眾想追夢的中年人重拾勇氣參加比賽，曾經參加過2000全球華人新秀歌唱大賽並獲得金咪大獎而入行的梁浩賢，因《中年好聲音2》再現人前，雖然15強止步但無阻他繼續發展音樂事業，近日更爆出今年將會結婚消息。

梁浩賢因《中年好聲音2》重返娛圈，跟劉威煌、譚輝智、顏米羔、甘永傑、王嘉明、梁思傑及導演潘文龍一齊組成「輕鬆啲」男團，定期開直播以歌會友。早前劉威煌45歲生日，一眾好友齊齊到到西貢食海鮮，席間壽星仔突然爆出梁浩賢將會在今年結婚的消息，掌鏡女士爆料：「今年係喇今年！」

顏米羔接著爆料說：「你扮咩啫，平時都係嗌老婆！」輝智更伸手跟浩賢握手率先恭喜，浩賢說：「睇住嚟啦！」劉威煌指有次聽到有女仔聲叫老公，沒想到一望轉頭原來是浩賢的女友Kit。浩賢口窒窒說：「咁好正常啦，熱戀情侶一定係咁呀啦！」有指梁浩賢拍拖約3年幾，女朋友是花店東主，一直支持男友追夢參賽，梁浩賢接受訪問時笑指未有婚期，承認有結婚計劃但非今年內會發生。