楊證樺沈可欣演聾啞日練10小時 冇諗過放棄：演員係我終身職業
《踩過界》來到第7集，講到疏忽照顧兒童案例，並由楊證樺和沈可欣飾演夫妻，之不過這對夫妻均是聾啞人士：楊證樺後天失聰，懂得說話但不太清楚；而沈可欣是先天失聰，只會手語及讀唇。眼見他們所做的動作及言語，真係好考演技。昨晚劇集一出街，獲得不少網民大讚做得好似，演技獲得認可。有趣的是，不少觀眾現在才知道兩人在現實世界都是夫妻。
《香港01》就問到楊證樺與沈可欣，兩人收到劇本之後，就開始密集式學手語及模仿聾啞人士。楊證樺說：「我哋去咗聾啞中心跟老師學咗3堂，之後就錄低啲片係咁練，放工就開始係咁練，一日起碼至少練十個鐘，呢個過程持續咗一個月左右。我太太就辛苦啲，佢就要學手語，要記多好多嘢，記到就快崩潰。」太太沈可欣補充：「之前都有興趣學，就係工聯會都學過3個月左右，但今次壓力好大。因為始終係聾啞人士專有嘅語言，唔想做錯。有時候NG，劇組人員因為唔識，唔知有錯，所以我都要主動報案，真係連瞓覺發夢都記住自己做手語。」從他們口中都感受到兩人的專業。
楊證樺是眾人眼中的綠葉王，他在2010的《巾幗梟雄之義海豪情》做宮崎少佐非常出色，還被前金牌監製李添勝大力嘉許，他都說：「算係我入行咁耐，最難嘅角色，要特登學日文。」成為了「綠葉王」，他先笑了笑，再問：「即係唔係主角咁解？」不過，他坦言喜歡這個稱號：「其實今次呢個單元，雖然得嗰4集，但我同老婆都算主角吖！做演員其實預咗付出同收穫唔成正比，但一套劇剩係得主角又得唔得？未必係咁，自己做好角色，有人欣賞係開心，但自己至少滿足咗先。」楊證樺做綠葉自得其樂，更視之為終身職業：「從來都冇諗過唔做，我好敬重陳鴻烈，就算咩情況都好，佢一心都係諗住演戲。」楊證樺深信總有一日都會有人欣賞：「有啲人被力捧，但冇好好發揮機會，咁自己努力去爭取機會之後，就好好做落去，祥仔（黎耀祥）一直都好努力，而家都上咗神枱。」提到自己的機遇未必與他人一樣，他說：「無辦法。」
除了是演員，楊證樺有份投資三間餐廳，比起拍劇，做老闆好似仲好搵啲。他卻連聲否認：「唔係㗎，會蝕錢㗎，有陣時餐廳都唔會個個月賺錢喇，睇住盤數其實壓力好大㗎。如果拍劇同做老闆二選一，我寧願拍劇喇，一嚟真係鍾意，二嚟監製肯畀機會我，有多幾套劇拍，我可以賺多啲奶粉錢喇，而家個仔仲細吖嘛。」太太沈可欣都話：「雖然係公司踩足30個鐘都試過，試過08拍完，收29（凌晨5點），屋企都住得遠，唯有瞓一陣再開過，不過都好在一個月得幾日係咁。」兩人都會Keep住做，賺多啲奶粉錢。
有不少觀眾現在才知道楊證樺與沈可欣堅係兩公婆，楊證樺聽罷笑住：「佢哋可能冇睇到新聞啫。」兩人相識已有十多年，但到後期才相愛，再結婚：「其實阿沈讀演藝再入行嗰時，我已經識佢㗎喇！當時都想溝佢嘅，不過timing就唔啱囉。」楊證樺笑言：「其實好多人知道我哋結婚、生仔，都呆咗！因為佢哋覺得我哋識咗咁耐，兜咗咁大個圈先至一齊。（咁咩原因令到你哋走埋一齊？）當時大家都單身，我年紀都唔細，見到同佢咁夾，我就覺得係緣份嘅安排。」楊證樺與沈可欣相識十多載，後來拍拖年多就已經結婚，這個過程十分之快，「我哋本來係bestfriend，後來一齊咗之後，上天就賜咗禮物畀我哋，就係小朋友，都覺得係時候要組織家庭，冇㗎！係好老土，但真係緣份囉！」就算現在結婚，兩公婆的感情都很好，「就算有拗撬，大家出發點都係為小朋友好，我哋唔會將唔開心留過夜。」真係好恩愛！