何太回應派綠帽事件　何伯預告將往上海發展

何太今早（30日）同老公喺室外做直播。

何太近日被指去年11月在其家鄉陽江插足他人婚姻，更向正印自稱懷孕。何太今早同老公何伯開直播時，網民瘋狂以「小三」洗版，何太只強調自己有兩段婚姻，亦無派帽俾何伯，又話自己成日被抹黑、惡搞，又話知道有人以慈善為名，但實際係喺陽江起自己底，何太話搞自己嘅人將來要受法律制裁，又稱手持黑粉群組嘅資料。又以「唔通俾瘋狗咬，我去咬返佢哋咩」展示自己嘅風度。

何太又話雖然有黑粉，但同樣有唔少熱心市民想幫自己，「我未得閒啫，好多老闆娘都等住我合作，我答佢哋而家時間未允許，如果啲老闆都怕你哋，我咪自己打江山囉。」何伯在旁表示：「我唔係撳住啲人，已經出晒片，我唔做呢啲咁嘅事，等佢哋開心下先。遲下等去到上海，啲旅行團幾十人，去上海合作。」何伯又稱有少有骨氣嘅兄弟撐自己，又話好多人想幫自己，又話「睇下邊個勢力大」。何太即點頭認同：「到時要做咩就做咩，帶貨咪帶貨，你干涉到我？你到時真係出大事。」何伯又稱喺深圳有唔少人揾自己合照，3歲到80歲嘅人都有，主要係因為大家都知自己善良。