【踩過界】裝義肢拍床戲有竅門　張振朗：做刺激嘢影響唔到嗰隻腳

無綫劇《踩過界》被安排在逢星期六、日播出，加上內地愛奇藝先播，結果是贏口碑、輸收視，但劇中幾位男女主角及配角，包括王浩信、蔡思貝、張振朗及李佳芯等，均獲得劇迷不少掌聲。尤其是張振朗飾演的GoGo，基本上可以說是盲俠團隊的行動組成員，即是有什麼粗重功夫，也會交由他負責，劇中還講到他身手相當了得，但近日劇情發展揭露了他的最大秘密，原來他竟然是一名右腳被截肢的殘障人士，跟王浩信一個盲、一個跛，讓人始料未及。

近日劇情講到楊證樺和沈可欣的疏忽照顧兒童案接近尾聲，開始另一個新單元，陳庭欣的跨性別人士風化案，而張振朗就有頗重戲分，其中一幕講到他駕着電單車，追上陳婉婷的私家車，希望對方為陳庭欣作證，可惜就發生交通意外，而有一幕仲見到張振朗全身浴血，右腳出現反常扭曲，甚為血腥噁心，如果大家以為張振朗就是因為這場車禍而要截肢，咁劇情就太過簡單啦，其實張振朗一直裝上義肢活動，而令他慘被變成跛仔的人就是豹哥單立文，無錯，單立文就是Big Boss。

之後如何發展，在此就不會劇透，讓劇迷自己慢慢追看，但講到張振朗右腳截肢，是一位殘障人士，即時令觀眾產生不少疑問，皆因怎樣看張振朗也是行動自如，而且有不少打鬥、飛車等動作場面，跟李佳芯還會有床上戲，莫非無綫又玩搬龍門？張振朗接受《香港01》訪問，他承認豹哥確是Big Boss，「睇佢成個侯賽因就知啦。(劇中是他令你變成殘障，會找他報仇？)呢樣真係要賣少少關子，但我哋四個，好似盲俠(王浩信)、思貝、佳芯都落咗好多心機去拍嘅，我自己覺得最後係有種80年代嘅情懷喺度。」

劇情發展落去，張振朗跟李佳芯會有肉帛相見的激情時光，那麼若然在床上的戲分，卻看到張振朗的義肢，豈不是大煞風景？張振朗透露：「咁梗係避咗去影唔到啦，義肢嘅嘢，都係三隻腳裡面嘅其中一隻，要做刺激嘢應該影響唔到嘅。但一場戲講我哋跳舞，我將條褲剪成熱褲咁，佳芯睇到都好開心下。(跳舞時會得返三隻腳？)哈哈，計埋義肢都仲有4隻。」

由於劇中講到張振朗不想別人知道自己殘障，所以要扮到如常人無異，這一下就考驗到張振朗的演技，在跛腳與健全之間，要拿捏得相當準確。「其實都係做返自己啫，有啲位就會注意一下，因為唔想俾人知，所以個角色都講我練到正常人咁，但有啲動作場面，好似要踢人，我就永遠唔會用右腳去踢，因為冇可能踢到人架嘛。」

不過有一幕戲分，張振朗也說不清楚，就是經常駕着電單車chok樣的他，座下的電單車其實是棍波車，即是要用左腳入波，右腳就用來剎車，但劇中他右腳是義肢又如何剎車呢？「根據電單車大全何君誠講呢，有啲電單車嘅剎掣系統喺手掣度。(那些是自動波！)哈哈，咁GoGo就犀利到可以將棍波變成自動波啦。」最後張振朗表示劇集放在星期六、日播不打緊，口碑好已經開心收貨，至於收視就永遠計算不到，吊下觀眾癮，更加會讓人記得套劇。