TVB副總經理（節目及製作）杜之克、非戲劇製作助理總經理余詠珊出席Big Big Channel台灣製作中心開幕典禮。提到在台灣成立製作公司，杜之克就話這是將Big Big Channel打入華人地區市場的第一步：「台灣好多人才，尤其是後生仔，文化同香港都好似，所以都會搵喺Big Big Channel搵啲音樂人呀、網紅去social。」做法與香港都相似，會在台灣製作一連串節目放上平台，杜之克同時亦寄望將來向星馬地區發展Big Big Channel：「希望有睇過TVB嘅華人都會用到。」咁內地呢？杜之克就話都積極研究緊點做：「因為係內地個度，其實網絡上嘅制度比較多程序去做，非當地人要做社交平台嘅嘢係要申請牌照，呢樣嘢我哋一直都會研究緊，今年內完成就難啲，當然越快越好喇。」

話說上周日播出《群星拱照Amazing Summer》派錢環節有網民就話似足分紅，一蚊Joe落力直播老婆生仔先得一萬蚊，杜之克聞言：「其實個環節係For Fun！」一直大眾都好有興趣知真正分紅給藝人的方程式是如何，杜之克未有正式回應按次數還是視乎直播內容：「不如講下基本先喇，觀眾可以喺直播畀錢送禮畀藝人，咁個直播基本就有禮物呢一部分（藝人直接落袋？）咁都會扣除行政費用嘅。」至於多少就不得而何。

杜之克自言有留意到有些藝人好落力直播，好似一蚊Joe直播生仔，杜生就話好歡迎藝人積極直播：「呢個平台係好高自主性嘅，藝人鍾意直播咩都可以隨心，好似一蚊Joe，佢就選擇以呢個方式，向大家分享家庭嘅喜悅。」藝人們咁落力，又直播生仔，譚偉權直播次數係全台最高，電話費超貴，杜之克會唔會有bonus畀佢哋？他說：「呢個要交返畀負責呢個項目嘅同事喇，但係我哋一定會鼓勵積極參與嘅同事，用咩形式呢？呢個要設計。（會唔會分紅上多啲？）呢個係主要方法喇，但仲有其他方法嘅。」

另一方面，TVB最近投資8億與美國製作公司Imagine合作成立公司開發ITT及製作電視節目。杜之克表示初步未有太多細節要公布，但他說：「呢個係幾令人興奮嘅諗法，因為TVB正式喺資金上同發行上參與到美劇嘅製作。」杜之克再說：「TVB係一間好大嘅製作公司之外，亦都係一間大型嘅跨國企業，所以呢個行動係根據成個企業而行嘅。」他表示這項投資是致力協助Imagine製作美劇：「我哋係唔會阻止佢哋製作美劇然後發行到國際，會唔會TVB藝人有份，呢個都要睇返個可行性。」今次交易並不會製作香港節目，而Imagine的劇集會陸續在香港播。