久未喺香港露面嘅Dicky張衞健今日（4日）現身大型新春節目綵排，講到今年大計，張衛健笑言見步行步，但都漏口風指今年中後期有機會喺香港開騷：「個陣容係⋯應該係要去紅館先做到！」問到係陣容係1定4個人，他笑而不語。

下月「登六」嘅張衛健，聽到「嘟一嘟 樂悠悠」時不禁大笑，仲話自己都「樂」，又幽默表示：「咁嘅年紀，戴住冷帽、黑超、口罩，喺外國人眼中呢條𡃁仔廿幾歲！咁仲想點？呢排都會約下啲前輩食飯，問下佢哋生活點過。」溫提可約蔡一智，事關對方今日「登六」，張衛健即表示蔡一智年長自己少少，「約佢食飯仲我要找數，唔約。」提到蔡一傑養病停工，Dicky謂有打電話問候對方：「Ok㗎！佢好強㗎！Very Good！」