李家鼎（鼎爺）自從去年推出飲食節目《阿爺廚房》，教大家炮製一連串懷舊菜，顯出一手好刀功及廚藝，榮升新一代飲食教父。鼎爺見到反應咁好，加上又做咗爺爺，於是好嘢唔好畀佢聽，推出《鼎爺廚房》食譜，聽講一出街就斷市，仲話出第二版加印6000本，真係好堅揪。記者眼見鼎爺風頭一時無兩，於是捕住書局，睇到一有補貨，就火速飛到門市，睇下鼎爺葫蘆賣咩藥，令到而家唔睇書睇blog嘅年代，師奶依然仆住去買！

買完本書，就梗係睇下個目錄，望下鼎爺教大家煮咩菜喇！其實啲菜式都比較平民化，例如有「茄汁煎中蝦」、「豉油王炒麵」、「炒五色菜」等等。而且仲有好幾味鼎爺喺節目上都有教大家煮過，就好似最出名嘅「魚腸焗蛋」、「兩面黃煲仔飯」，好就好在睇唔到節目都可以再重溫。雖然鼎爺廚藝好勁，大家都覺得呢本書屬於中等level，但係鼎爺好貼心同user-friendly㗎，唔介意同大家分享用開咩砧板、自家製馬拉製點整，基本揸刀手勢，等初學者都可以打好個底，最重要、鼎爺要用300字講明最好就係用明火，真係袋錢入你袋。除此之外，仲有鼎爺型爆煮餸相，Gordon Ramsay都唔夠佢揮喇真係！

所謂「魔鬼在細節」，食譜咩材料唔係重點，最重要係食材嘅處理手法，鼎爺本書嘅精華所在就係「鼎爺話你知」，如果跟到足，食到包你會係咁郁。你點會估到「薑蔥火腩生蠔」嘅精萃就係加完芫荽同蔥段之後，就係冚煲蓋，然後喺蓋上面灑玫瑰露酒，將酒香滲入食材，呢招真係冇得輸！仲有「白切雞」，呢味餸睇落好似唔太難，但揀雞就好重要，鼎爺話最好就買二黃雞，即係生過一次蛋，準備生第二次蛋嘅雞，因為呢款雞長肉、有雞味，肉身就會比較香，浸熟之後再擺入冰水，咁就可以避免啲肉熟過頭，更皮爽肉滑。

除此之外，一啲大家眼中簡單到不得了嘅菜都有秘技，就好似「豆角炒豬膶」咁，鼎爺教大家要同街市豬肉佬打好關係先，咁就可以比較容易買到新鮮豬肝，豬腰就要買乾身嘅，咁先證明冇啤過水。炒豆角嘅時候可以再落下黃砂糖，咁就可以去咗陣草青味。食譜仲有大約40道菜，由小菜到湯再到糖水都有教，師奶們如果跟足鼎爺，應該可以留住老公個胃，點都唔肯走。