Anson Lo否認經理人偏心 Edan笑談《12怪盜》MIRROR齊爭影帝一事
撰文:鄺鈺瑩
出版:更新:
男團MIRROR的三位成員Anson Lo(盧瀚霆)、Edan(呂爵安)和姜濤今早(15日)現身尖沙咀出席眼鏡代言活動,神徒、姜糖、爵屎(粉絲暱稱)逼爆商場。
早前Jeremy(李駿傑)劇透有成員將在今年出碟兼開個唱,訪問時,Edan口快快表示自己嘅solo con將在下半年舉行,收到可劇透指示嘅Anson Lo補充既會有solo con亦會有出碟計劃,而個人新歌亦已進行中。另外,提到早前直播中被爆兩年仲未考到車牌,姜濤表示只係學過兩堂,但已考慮復課,「但大家唔好影,等我pass咗你哋再po。」
Edan生日在即,日前與家人食飯慶祝,提到妹妹小如豬因「現身」TG群組而引起猜度,問到是否打算搵妹妹做admin,Edan否認:「其實佢不嬲都喺入面,但應該未有呢個時間(做admin),等佢畢咗業再算。(咁FC進展如何?)一直都盡所能搵方法,都已經有定案,好快會有消息。」
而對於有鏡粉在網上投訴經理人偏心一事,Edan亦有聽聞,更笑言:「我都想」,而他亦表示一直有不同嘅聲音,但希望大家理性討論。Anson Lo則補充:「我哋經理人有好多唔同部門,太多事情發展緊,每年都有唔同計劃,所以大家唔好咁擔心我哋嘅工作發展,所有嘢都隨緣而安,繼續努力做好自己。」
而對於電影《12怪盜》全員報名角逐金像獎最佳男主角一事,Edan解釋:「咁啱有部電影喺呢屆發生,所以會報名,而12個人都係主角,所以咁報當然唔會發生𠝹票,因為好多人比我哋優秀,絕對唔擔心會𠝹到票。」