《萬千星輝頒獎典禮2024》今晚（19日）舉行，「萬千光輝演藝大獎」由電視廣播有限公司總經理（節目內容營運）曾志偉頒獎，獎項最終由「萬能鍾」鍾志光奪得。

曾志偉頒獎前表示，以往這個獎都會事前講定畀得獎者知，自從曾勵珍（珍姐）獲獎那一屆，已沒有了這個傳統，甚至要欺騙得獎者攞第二個獎，結果那年更俾珍姐鬧：「點解咁衰！我攞獎唔話俾我聽，我都冇準備！」他又否認頒獎有內定畀親生仔，表示：「今晚大家覺得好奇怪，會覺得得獎者都好驚訝，上嚟好似都唔記得，冇諗過講稿或者乜嘢。我講畀你聽，係！因為冇一個人知道佢會攞獎，因為全部嘅獎都係觀眾投票，我哋同事投票而得到最多票數，所以係完全唔存在係咪親生仔、係咪公司簽咗長約，係咪任何嘢，佢哋得獎就係應該得到嘅，就係觀眾認為佢最好嘅，所以今晚得獎者全部都係實至名歸嘅！」