周吉佩（吉吉）今日（7/2）現身旺角出席周吉佩《延續·第三人生演唱會》宣傳活動。吉吉接受《香港01》訪問時表示：「距離22日剩返唔係好多時間，而家最緊要係練好啲歌先，同埋要做好健身同跳舞等等。因為上年11月尾完咗個騷之後，我就休息咗一個長嘅時間，不斷吃喝玩樂咁，咁變咗啲肉鬆弛咗少少，咁所以要努力啲修身。」

被問到身形走樣愛妻有否不滿？吉吉笑言：「其實佢就冇刻意去監控我嘅飲食習慣，相反佢係唔想我咁Fit嘅。（老婆怕冇安全感？）其實佢不嬲都唔鍾意我太Fit，佢係想我有啲肉地，會覺得得意啲。但粉絲就唔會咁覺得，佢哋會話我要再Fit啲。（如何取捨？）我話知佢啦，我咁梗係一定要Fit啲啦。（自己嘅要求係點？）其實我又唔使話8嚿腹肌嘅，就咁瘦返啲就夠。」