【乾坤一收…】龍哥廢校靈探被全刪　阿Bob：考慮部分觀眾意見

「乾坤一開一收，三七氣流一轉」…以freestyle超渡方式一舉成名的龍哥（杜慶龍師傅），落實了今晚的《Big Boy歷險記》不會再出現。本來有消息指以靈探為主題的集數，由四變二之後，龍哥的戲份全cut。到今日上到TVB官網，發現《Big Boy歷險記》的節目介紹，講到今晚的主題是「人在野」求生訓練，完全不見龍哥的名字，由杜慶龍變成梁Sir，內容相信是一眾主持要在鏡頭前食蟲、蜘蛛等。似唔似bear grylls嗰套《人在野》就未知，但至少肯定本來龍哥帶一眾主持到元朗廢校靈探的第二集，就要單靠第一集最後播出微量、僅餘的預告片了。

而主持之一的林盛斌接受《香港01》的訪問，知道龍哥戲份全cut的消息，他說：「今次自己參與拍攝嘅部分唔多，所以好多播映嘅具體細節都冇特別留意，而今次節目調動係公司嘅決定，我哋會尊重同配合，確實電視台需要考慮嘅因素有好多，包括部分家庭觀眾嘅意見，不過我知道台前幕後工作人員用咗唔少心機同時間去製作今次節目，所以都希望公司稍後可以考慮安排喺其他頻度或者其他平台上面，播放俾有興趣嘅觀眾及網友去欣賞，亦多謝大家嘅支持。」相信龍哥的表現都震驚了不少觀眾，戲份被刪都應該係顧及家庭觀眾的感受。至於問到龍哥的真正底細，阿Bob就話不太清楚，與龍哥因為節目才相識，只知他平時都幫了不少人。