無綫製作「認真」就大家都知，唔係點會提供到咁多歡樂俾大家，經典如陳豪於古裝劇《帝女花》中飾演崇禎皇帝，唔小心將「同朕再查吓」呢句對白，講成「同朕再check吓」都可以照樣播出街。而著古裝講英文事件，在新劇《超時空男臣》又再出現了！自蕭正楠、曹永廉及何廣沛呢三位臣子受命於張彥博飾演嘅太子，穿越時空尋找太子妃王君馨，搵係搵到，曹永廉連愛意都有埋，比太子知道的話，隨時要處斬。

日有所思，夜有所夢，昨晚一集就係講述曹永廉夢見自己重返明朝，各自匯報由2017年所帶來的新奇玩意（如電話、打火機、平版電腦）後，被張彥博指責俾緣帽佢戴。「你喺2017年做嘅好事，本宮已經check過晒！你對太子妃心存歪念……」又係check？又係古裝劇？到底咩玩法？

有網民就笑指此句係「明串陳豪」，又有指「太子識講英文咁勁。」而張彥博接受記者電話訪問時，就話：「其實我都係照劇本講，我覺得呢個劇本幾好，好搞笑，而且呢個劇超現實，夾雜少少英文給觀眾笑吓都唔錯，笑多啲先有正能量嘛。」編劇新招果然有效。