【超時空男臣】何廣沛大台無熟人　知心友得賴慰玲：其他好少見

近日熱播中的無綫劇集《超時空男臣》，蕭正楠、曹永廉和何廣沛由明朝穿越至現代，劇情胡鬧搞笑，而率先跑出的不是男一蕭正楠，而是飾演太監的小冬何廣沛，經常被朱晨麗調戲，陰柔害羞的小鮮肉演出，演技備受讚賞，2012年才從藝訓班畢業的他，上位確是快過不少男藝員，更成為今年台慶頒獎禮飛躍進步男藝員的大熱門，這位無綫新紮小生，今日接受商台節目一圈圈訪問，卻表示同拍劇演員很少聯絡。

在電台訪問中他被問到跟朱晨麗的合作，何廣沛強調跟對方不是太熟，「拍完劇就唔見囉喎，通常拍完都冇乜聯絡，去到宣傳先再聯絡。」其後他接受其他傳媒訪問，被問到跟不少女藝人合作也未有擦出火花，他再次回應這一行很現實拍完就少見，友情只是回憶，講來不無唏噓，29歲已經傷春悲秋，體會到人情冷暖？何廣沛接受《香港01》訪問，他強調並非有感而發，只是各有各忙，當然少了聯絡。「自己有劇要拍，其他人又有劇，合作嗰兩三個月咪朝見晚見，但再拍另一齣劇，又對住另一team嘅演員或者幕後合作，冇時間同之前嗰班聚舊，唔係話生疏咗，只係各有各忙。《男臣》嗰啲因為宣傳都見多咗，《親親》嗰啲都有約嘅，早排我生日，郭子豪、江嘉敏、陳婉婷佢哋都有出嚟同我慶祝。」

在電台訪問中，何廣沛提到自己拍攝《女人俱樂部》時，飾演吳啟華的年青版，他自嘲當時名副其實是「一嚿飯」，去到《樓奴》戲分多咗就變成「飯桶」，當年仍是新人的他，對演戲可說相當陌生，他說很多謝前輩黎耀祥和好友賴慰玲教他演戲，「祥哥在拍《財神駕到》時送咗我兩個字─自然，自然咁去演就得，我一直諗咗好耐。」黎耀祥貴為視帝，教戲當然是言簡意賅，而賴慰玲是演藝出身，有理論有實踐，對何廣沛來說更易明白，「賴慰玲由第一套劇《女人俱樂部》已經認識佢，合作咗三四套劇，亦唔係太多場口，佢演戲方面嘅學歷好高，教我好多佢哋學過嘅知識啦，訓練班學唔到嘅嘢，佢好樂於分享，教我分析解讀劇本，佢都俾咗好多建議我，有時我鬆懈咗，佢都會提點我，令我唔好自滿，繼續去努力咁囉。近排佢安心養胎，等做媽咪，佢拍《棟仁的時光》喺公司都見過佢，有咗5個月都好敬業返工，祝佢生個健康嘅BB啦。」

不少藝人為尋求機會，也會敲監製門，毛遂自薦，而何廣沛卻沒有這些經驗，「我個人嘅性格都比較被動嘅，少啲咁樣主動出擊，公司安排做咩咪做咩囉。」何廣沛話入行後，很多人也要多謝，尤其是給了他機會的監製羅永賢，「《律政強人》同《超時空男臣》都係佢嘅，合作得最多，大家熟絡咗，《律政》嘅Nick有亮眼之處，俾公司睇到我嘅進步，呢頭安排我做天才律師，之後就安排我做好細膽嘅太監，佢好獨具慧眼，安排唔同嘅角色俾我。」對於「飛躍」大熱，他說「我自己就唔諗咁多呢啲嘢，如果攞獎嘅話梗係開心，但希望大家都係覺得我值得。不過問到他之後的小冬會否變奸，是否明朝奸臣魏忠賢，他即笑說是很大的伏線不能穿橋，更叫劇迷慢慢追看，大家要拭目以待啦。