森美六舊腹肌好搶眼　43歲型佬：成日喺屋企唔著衫周圍走

無綫重頭劇《誇世代》已經去到煞科階段，作為劇集的第三男主角，森美昨晚就放了兩張相上Facebook。相中最吸引的一定是森美肚上的六舊腹肌，加埋陳豪，一個43歲，一個46歲，兩個中佬完全沒有中年危機，依然身形fit爆，真是好神奇！

 《香港01》為了知道森美為什麼可以練得身形這麼好，於是就找他解一解畫，他說：「其實係有場戲要打黑拳，咁監制叫到緊係要操fit啲喇，好睇啲呀嘛。因為陳豪好鬼fit，你知佢model身形嚟架嘛，如果我唔操fit啲拍埋去就無咁好睇。套戲拍咗半年，呢半年我都要節食，唔敢食太多嘢，又要控制個卡路里。規定自己每日只有八個鐘可以食嘢，可能就會唔食早餐剩係食夜晚，都會跟吓啲餐單，早餐就兩隻雞蛋、一隻蕉同埋蕃薯，晏晝食沙律，夜晚就剩係食烚雞肉。每日都要做個幾兩個鐘運動架，我以前打開泰國，而家跟咗個西洋拳師傅學打拳。」

練到咁身形咁好，原來之前森美比起而家更瘦，他說：「呢兩張相已經肥返少少，一開頭拍嗰陣仲瘦，不過因為監制話我太瘦喇，搞到個樣好惡，唔好睇，叫我唔好再減磅，影響上鏡架嘛。其實都唔會話辛苦，呢啲演員責任嚟，同埋操fit咗個人自己都開心啲，成日都會照吓鏡望吓自己，喺屋企都會唔著衫周圍走。」平時在電視上見森美多數是綜藝節目，回想返對上一次見到森美拍劇，已經是2012年的《法網狙擊》，今次重頭劇有份做第三男主角，證明公司都十分看重他，「今次呢套劇都算係第三男主角，不過戲份唔係好多，因為中間有十幾集係講我去咗西藏所以無出鏡，所以其實只係得頭同尾。我都想繼續拍劇架，因為成班人一齊真係好開心，今次我比較多同陳豪做對手戲，兩個男人等埋位嗰陣就會傾吓男人經，講吓點keep fit呀，湊仔呀。同埋幕前幕後嘅人員都好落力，大家呢半年一齊工作真係好開心，希望之後都仲有機會拍劇喇！」森美大哥咁有喜劇細胞，其實無綫真的可以考慮將來多點找他拍劇，起碼不用來來去去都是那些演員，多點新鮮感給觀眾不是兩完其美嗎？