夏天為大地帶來美腿，每日睇Facebook都充斥一埋比堅尼船P照，唔係得女仔先有Amazing Summer，男士一樣有㗎﹗之前有森美陳豪大Show操肌成果，近日（15日）就有位男星在沙灘疑似半裸「背多FUN」，估佢唔到居然係吳業坤﹗坤哥上載一張裸背照，手上拎住條白毛巾遮住臀部，That’s it係咁多，上身裸背下身露腿，望住大海，其後再有一張船上裸背著長褲嘅相，連謝安琪都忍唔住留言問「腳幾長」。雖然show肌係好吸晴，但更令人在意的其實係沙灘上的一大堆垃圾﹗

坤哥接受香港01訪問時表示：「當日係拍攝《誇世代》最後一組戲，去左蒲台島浸左成日水，同啲垃圾暢泳後剛剛上水好熱，有著底褲嘅，諗住全劇完影張相留念啫。」面對如此大量垃圾都繼續落海拍攝，果然非常專業。不過蒲台島一向有「香港南極」之稱，景色優美係唔少香港人假日郊遊熱點，垃圾到底係遊客棄置還是？坤哥話：「聽船家講之前呢度好靚架，但好似話因為水流問題，好多垃圾跟住水流飄左嚟蒲台島岸邊，變相愈積愈多。」坤哥指劇情係講佢流落荒島，要落水兼曬足9粒鐘，拍畢即皮膚敏感，後頸位致脫皮。「那裏的海面比天星碼頭更污糟，導演要我真的落水游，我夾實了全身的窿才敢下水呢，哈哈！」

翻查紀錄，原來係內地垃圾隨水流湧港，造成海洋垃圾問題，雨季水流令香港西部及西南部積聚較多垃圾。世界自然基金會香港分會（WWF）去年調查全港34個地點，發現蒲台島是垃圾黑點，海浪將垃圾推入海蝕洞，堆成三至五米高的垃圾山。在沙灘劃出5米闊、平均約25米長的取樣地帶，每個取樣帶平均發現1,455件垃圾。海面垃圾量亦驚人，漁民平均每兩小時在沿岸水域打撈到517.6件漂浮垃圾。

藝人身為公眾人物，都有份為社會環保出出力，坤哥話：「fans club都有keep住做義工，例如去收集一d賣淨麵包去派俾露宿者。自己都好希望有機會同fans一齊做d環保活動，但係時間上比較難遷就，嚟緊都會努力安排下﹗」