阮小儀自爆入院開刀 切除甲狀腺：醫生話照到有囊腫
香港人放長假通常都會安排去旅行，阮小儀剛剛放兩星期假，卻選擇入院做手術，直至復工開咪佢自己上網講，大家先知呢件事，真係俾佢嚇一跳﹗小儀於Facebook上載兩張相片，一張喺病床上左手插住喉管，另一張應該係友人送花慰問。忽然聽到小儀入院消息，網民都感到好愕然，短短時間已經過千留言。小儀接受《香港01》訪問時話：「最擔心影響聲帶﹗」
小儀率先喺節目《早霸王》中，講番入院做手術嘅前因後果：「其實兩星期前剛放假就做咗手術，無同大家講係因為做手術前自己都驚唔太安心。因為甲狀腺有囊腫，今次入院係割左甲狀腺。雖然無大頸泡咁誇張，而係好似有個波波喺喉嚨附近位置。」
原來早喺2015年，小儀就發覺身體出現問題：「2015年試過聲帶癱瘓聲沙，連用丹田發聲都做唔到，耳鼻喉醫生照完內窺鏡，話今次失聲唔多正常，不如照一照CT，照到喉嚨有囊腫，抽針CHECK左唔係癌細胞嗰類，當時醫生話可以觀察下先。」去到今年初森美覺得小儀頸部有異樣，建議去睇醫生，發現右邊結節有成4點幾cm大，左邊都有粒差唔多大，之後就決定呢個假期入院動刀。
小儀接受香港01訪問時話：「當日安排左朝早9點做手術，媽媽陪我前一晚入院準備。做完手術就無乜後遺症啦，係要KEEP住食甲狀腺素補充劑，醫生話就好似維他命C嗰D咁，因為身體宜家無得自已產生甲狀腺素所以要補充番，如果唔食怕會影響心臟，記得每日食番補充劑，同埋KEEP住返去見醫生就得。工作方面暫時OK無受影響，暫時未有飲食節目要拍，不過手術後都要戒口，你知啦女仔都係貪靚，自己怕傷口發炎，蛋呀海鮮嗰D都食少左，宜家都正常飲食不過就唔會放肆咁啦。」
雖然話唔會有咩後遺症，不過手術前小儀都曾經非常擔心：「本身最擔心影響聲帶，怕手術時整到聲帶，我地做呢一行真係唔似做文職咁，好需要把聲開咪，好彩做完手術係第一日聲沙出唔到高音，之後都無問題啦。有朋友都做過呢個手術，話第一個星期痛到唔想講野，好在自己無發生呢個情況。」
兩星期前開刀，到復工先自行公佈消息，除左好好休養之外，小儀都非常感激好友及同事關心：「病嘅時候緊係都想有人依靠下，不過自己宜家好OK，話就話得森美知我做手術，但其實電台節目同事都知呢件事，都有關心問候我，佢地都話入院俾我休養下，無特別去醫院探自己。知道有好多朋友關心，又唔會喺醫院嗰幾晚特別要人依靠。」
話晒小儀都係幕前工作，醫生都盡量希望手術後傷口唔會影響外觀：「如果唔想傷口外露，醫生話可以Underarm或口唇入面開刀，以前係領口位開刀方便高領衫可以遮一遮。但宜家好多醫生揀喺頸紋位落刀，當傷口癒合變番白D，就同頸紋就好相似唔多覺。」森美喺節目入面提醒小儀唔好食生魚，原來之前小儀面上有傷口去左睇整形科醫生，醫生話外國有文獻寫住，有傷口唔好食生魚或飲生魚湯，因為生魚肉會令肌肉生得快，好似大家講嘅肉芽令傷口凹凸不平，所西醫都唔建議有傷口時食生魚。
為免大家擔心，小儀亦於網上報平安：「而家冇咗2粒大嘢，亦冇咗甲狀腺，以後每日記住食甲狀腺素補充劑就基本上ok㗎嘞！而家傷口入面好番嘅進程就等身體自己搞掂㗎嘞，醫生話俾啲時間個傷口會冇問題嘅！」小儀話呢幾日出左POST好多朋友關心，多謝每一位，亦意外發現原來好多人都遇到呢個病，唔知點面對，大家喺POST度SHARE經驗同意見，知道多D都係好事。