【同盟】御用頭馬何俊軒拍劇斷十字韌帶 心淡辭職:係我最後演出

撰文:
最後更新日期:

何俊軒的出現,有不少人讚好。

《同盟》出街以來,監製文偉鴻一直活躍於社交平台,除了叫大家留意陳展鵬與胡定欣的爆點,都好用地介紹劇中其他專業演員及綠葉。昨晚就有何俊軒,他飾演要傷害令熊集團的魔頭。經文偉鴻都介紹下,原來何俊軒拍攝另外一套劇時腳部關節受傷,需要休息長時間休息。最後他未完成的部份只好用對白草草交待。而何俊軒在個人Facebook留言:「其實今次受傷對我打擊好大 (斷後十字韌帶)可能需要漫長時間去休養同物理治療 所以我作出一個重大決定!我已經同TVB辭職了,終止16年演藝生涯,決定移民加拿大 呢段時間我會好好裝備自己。希望我真係有機會可以再返TVB同大家見面,一齊拍戲、一齊食飯盒、一齊捱夜⋯所以今次可能是我最後一次幕前演出,希望大家喜歡我呢個角色。」文偉鴻及劇中演員梁烈唯、歐瑞偉都有留言為他打氣。

何俊軒就是拍這一場戲受傷。(網上圖片)

何俊軒現時生活都時出外療傷,還有做運動。

記者致電向何俊軒了解,他早前在《踩過界》拍攝動作場面遇上意外:「當時要箍住位女演員,但因為跣腳,成個人連帶位演員一齊向後跌,佢就壓喺我身上,我亦郁唔到,就好似扭毛巾嘅狀態咁,冇諗過咁嚴重,連筋都斷。」據知那場戲將會出街,他要一手從手扣住蔡思貝。他斷十字韌帶的傷嚴重,帶來的影響亦很深遠:「醫生檢查完同我講都起碼要唞一年,就算好返都盡量避免動作戲。其實我已經有八個月冇返工,最初連街都出唔到,最多出去做治療,過程好痛苦。太耐冇運動之下,都因為咁大腿萎縮咗,加上菠蘿蓋發炎變得好厚,行路都跛下跛下,由旺角雅蘭中心行去登打士街都要半個鐘。」現在過了八個月,距離康復還有一大段距離,何俊軒惟有靠每天游水,慢慢訓練好腿部肌肉。

受傷之後的時間,何俊軒坦言很痛苦:「當時太太咁啱有事處理要離開香港,受傷嘅時候都自己一個人面對,為咗唔令太太、屋企人擔心,我都好堅強話冇事!屋企仲有成箱公仔麵!然後自己call的士,趷去睇醫生。同時又諗咗好多嘢,因為今次受傷,發覺自己身體狀況大不如前,落樓梯都有恐懼,唔係話怕辛苦,如果我怕辛苦,都唔會做咗十七年,但真係有好大陰影。」何俊軒自言有不少朋友都鼓勵他:「佢哋都叫我唔好放棄,而家事業有啲起色,等好返再嚟過。」何俊軒停頓一會,續道:「但係我真係過唔到自己個關,公司畀好多機會我,有好多發揮,我好願意接受每一項挑戰,以前嘅我要跳樓跳海都冇問題,但而家如果再做落去嘅話,拍追逐戲拍拍下話唔得,人哋一定會覺得有傷又唔早講,我對唔住人又過唔到自己嗰關。」何俊軒受傷後所受很大打擊,再見到眼前有機會都要無奈推掉,他說:「我真係灰咗好耐。」

+7
+6
+5

做了17年演員的何俊軒,因為受傷要終止演員生涯,對他而言充滿矛盾,最後無辦法、又想好好養傷的情況之下,他決定向TVB辭職,移民加拿大,望有一個新開始。他形容這是他的「唯一出路」:如果去到加拿大,我可以無後顧之憂,至少坐3年移民監真係可以畀我專心養傷,就算要重新開始,我都唔介意,學一門手藝做十年,我都係50幾歲啫。」何俊軒講起移民,語氣都很堅定,他還想落地生根,與結婚7年的老婆生BB。

何俊軒的傷勢,可以見到膝頭好腫。

為了養傷、移民,何俊軒用了三十幾萬,已經是豁出去:「我銀行戶口得返幾千蚊,剩係去治療、診金都用咗唔少錢;仲有我移民個度去搵顧問呢,申請時畀一筆錢,成功申請後又要找尾數。而家真係唔係做運動同睇腳,都唔會出街,每個月都只係用工傷個筆錢。」他說向TVB講辭職,在港留到11月就會無聲無息地走,他講笑地說:「放心,我會買到機票走嘅。」離開是難捨難離的,何俊軒最後還是多謝TVB:「多謝幾位監製,一直都畀機會我,自由度其實好大⋯要走真係唔捨得,希望之後有機會再見。」相信有不少觀眾都對何俊軒的辭職感到可惜,但真心希望他早日康復!



X
請使用下列任何一種瀏覽器瀏覽以達至最佳的用戶體驗:Google Chrome、Mozilla Firefox、Internet Explorer、Microsoft Edge 或Safari。為避免使用網頁時發生問題,請確保你的網頁瀏覽器已更新至最新版本。