今晚播出嘅新一集《踩過界》未播就引起唔少網友討論，事緣該集劇情就講盲俠在與Golden團圓後，遭殺手埋伏，盲俠好快就聽得出，當然即刻拖住Golden逃走。混亂期間盲俠就搭𨋢離開時不幸被殺手在背後插一刀，Golden得知主人有危險，即刻咬住殺手可惜最後難逃一劫被殺手用刀插死！網友討論嘅並不是Golden被插死，而係TVB懷疑抄襲2011年韓國懸疑電影《盲證》其中一幕，只是場景由地鐵變成隧道，唔通真係「如有雷同 實屬巧合」？！

2011年由金荷娜及俞承豪主演的電影《盲證》，其中一幕講述失明人士秀雅(金荷娜飾)意外捲入一場兇殺案，其中一幕就講述秀雅正當與導盲犬瑟琪搭地鐵時遇上殺手，瑟琪知道有危險後立即保護主人，可惜最後當秀雅搭𨋢離開時瑟琪就馬上咬住殺手，最後被用刀捅死，而秀雅就脫離險境。不少心水清嘅網友昨晚睇到《踩過界》今晚嘅trailer都話對劇集好失望，仲暗嘲TVB仍然改唔到其劣根性，都話唔會咁啱得咁橋係狗幫主人擋殺手，但我話呢兩個劇情都好令人心痛，都係會睇到觀眾喊。

講返《盲證》呢套懸疑電影，2011年上映時已大獲好評，票房亦相當不錯，女主角金荷娜更憑住該電影成為韓國青龍獎及大鐘獎雙料影后。不得不提嘅就一定係《盲證》呢套電影除了有金荷娜同有國民弟弟之稱嘅俞承豪出演之外，仲有現時人氣超爆嘅偶像朴寶劍在戲中飾演金荷娜的弟弟，更是其出道作，當時朴寶劍嗰樣真係好pure好true！！BTW今次《踩過界》又真係近年少數觀眾好buy嘅劇集，希望呢一幕唔會成為劇集嘅敗筆，唔會影響到大家對佢嘅印象。