今朝有場世紀拳賽Mayweather激戰McGregor喺美國舉行，《同盟》黃長興都好期待，喺黃長發屋企睇電視直播，自己就開住Big Big Channel「轉播」賽事，之但係長興睇緊嘅係nowTV收費頻道，就算TVB唔嬲豬都可能牽涉版權問題喎！

朝早黃長興好準時就喺Big Big Channel開直播，佢話今日8號風球都去咗細佬黃長發屋企，因為要一齊睇拳賽直播，轉頭鏡頭影住屋內有兩隻牧羊狗同幾位外籍人士，電視機則直播緊拳賽。

黃長興話自己冇睇開拳賽，但呢場係世紀之戰所以好有興趣，佢講嘅呢場的確係萬眾期待嘅！麥佳格（Mayweather）對美韋達（McGregor）兩大傳奇對戰，鍾意睇打拳嘅一定會知，賽事今日喺美國拉斯維加斯舉行。

好興奮嘅黃長興介紹咗一陣就用手機對住電視機，「轉播」人哋嘅直播，足足播咗30幾分鐘，不過播到中段黃長興手機接收可能有問題，變成有畫面冇聲音，長興於是未等賽事完結就中止直播。

但係呢場賽事並非由TVB播放，而係nowTV嘅收費頻道至有得睇，齋睇呢場賽事都要$338，換句話講，黃長興係播緊其他電視台嘅節目，而且可能牽涉版權問題喎！

《香港01》致電黃長興，佢解釋：「本身諗住去餐廳睇嘅，點知因為工作通告未清楚，book餐廳full晒，最終去咗細佬屋企睇。」佢話因為手機接收得唔好，有粉絲稱有聲冇畫面，有啲就有畫面冇聲，所以拍到第6 round賽事就中止live。

長興都話自己當時係睇緊nowTV，問佢怕唔怕TVB唔高興，佢就尷尬笑住話：「唔怕嘅！Big Big Channel話咩都可以做嘛，我都係睇緊直播嘢啫，focus個賽事啫！好多平台都睇唔到呀！」至於咁做可能違反某啲版權問題，長興就話唔清楚：「呢啲我又唔知喎！」下次做直播都係小心啲好！

部份照片取自nowTV網頁