恭喜恭喜﹗Phil林奕匡同Rikko李靄璣拍拖十年終於喺香港時間8月29號凌晨，於加拿大溫哥華Phil嘅母校UBC大學，校園內一間過百年歷史的古宅Cecil Green Park House舉行婚禮。佢地邀請摯親好友約80人出席，當中包括馮允謙、黃美棋及男友鍾健威、Dear Jane主音黃天翱（Tim）以及組合Robynn & Kendy。新郎哥行禮後亦上載照片到Facebook並留言話：「今日真的很感動 不斷笑 不斷哭，遲一些再和大家分享感受！！」仲加上Hashtag #林生林太 #philandrikkoday，So Sweet﹗

Phil於婚禮後上載三張照片，第一張係新郎哥一身白馬王子look，左手插褲袋笑住march in，身後仲有擔任伴郎嘅好友馮允謙，左右兩邊有數十位親友見証呢個重要時刻；另一張相Phil拖住身穿魚尾婚紗嘅Rikko向後回眸，笑容一致相當有夫妻相；仲有一張係Close up二人交疊嘅雙手，見到一對婚戒行簡約風，真係睇相都感受到佢地幾咁幸福。

Phil自言是個非傳統的人，但今次婚禮也有做傳統儀式，包括向長輩斢茶，他自爆在婚禮中多次感動落淚：「當我哋遞茶，叫聲爸爸媽媽，嗰一下好感動，咁多年嚟佢哋都當我係親戚嘅一部份，今次係officially向佢哋表示敬意，嗰一下真係冇得唔喊。」而一對新人喺婚禮上向對方讀各自寫的誓詞時，Phil看着太太在流淚，卻又不能為她抹淚，也是婚禮上的感動位之一，他指伴娘和伴郎的發言亦令他們非常感動。

新娘Rikko直言自己由斟茶開始便感動落淚，幾乎喊足全程，甚至「喊到豬頭咁」！她感激從世界各地，包括來自日本、拉斯維加斯、多倫多、魁北克、香港等地的親友，特地飛到溫哥華去參加她的婚禮。Rikko透露她和Phil在婚禮上有個First Dance，其實是他們返加後，特地請老師教他們，雖然「臨急抱佛腳」，但兩人結果順利跳出他們的first dance。

Phil坦言因為婚禮舉行前一天才到會場，所以沒有時間準備驚喜給太太，反而是班兄弟姊妹有送手作禮物給他們，Phil稱：「太太開心，我就開心。」Rikko透露是黃美棋及鍾健威以828元加幣摺成紙幣心心的擺設，再加上心意卡。送給在8月28日結婚的Phil和Rikko。

剛剛成家的Phil指婚後沒有很明顯的分別，因為他一直視太太為終身伴侶，只是現在正式多了一對父母及弟弟，他自覺非常幸福。而Phil的媽媽對兒子娶得Rikko感到開心又安心，因為林媽媽大讚Rikko是個好好的女孩子，幸好兒子沒有辜負對方，亦做了正確的選擇。

提到造人大計，Phil坦言未準備好，過兩年後才考慮，但他笑言希望先仔後女：「因為哥哥會照顧妹妹，但姐姐照顧細佬，會變成縱個細佬，不過呢啲冇得控制，哈哈！」Phil笑言準爹哋Tim沒有特別教他「造人秘技」，但就叫他「趁嫩生」！Phil和Rikko稍後便會拉隊去旅行，感激一班兄弟姊妹全力支持，預計明年3月會去意大利補度蜜月，遲啲亦會在港補擺喜酒，屆時也許會補做接新娘和玩新郎的環節。