黎明洗腦電音原來係向Kpop取經 晚晚捉雷頌德落首爾夜場蒲住學習

撰文:洪曉璇
出版:更新:

香港嘅舞曲代表,第一時間大家會想起那一位?郭富城?草蜢?其實有位滄海遺珠,雖然佢嘅電影甚至金句較為著名,不過2000年前後一連幾首電音快歌,帶領當年舞曲潮流,連張家輝杜汶澤都要相繼模仿﹗一向走情歌王子斯文路線嘅Leon,當年點解忽然轉路線?由於幾首快歌都出自雷頌德,外界一向認為係Mark掀頭轉style,點知佢喺奇妙電視節目「天下第一friend」中,就苦笑話:「黎明係無人叫得佢郁架,所有野都係由佢自己出發!」

LEON嘅快歌真係好有魔力。(資料圖片)
雷頌德與太太梁家玉擔任奇妙電視節目「天下第一friend」嘉賓,接受鄭紹康訪問。

《眼睛想旅行》、《聽身體唱歌》、《全日愛》、《越夜越有機》、《盡情地愛》等等,作為七八十後真係聽到個歌名都忍唔住哼幾句!唔少歌迷話呢啲曲風正正係而家嘅K-pop Style,大讚Leon早人哋十幾年玩電音玩到出神入化,有人歸功於Leon嘅御用音樂總監的Mark,佢接受鄭紹康訪問時就苦笑話:「黎明係無人叫得佢郁架,所有野都係由佢自己出發!」

Mark解釋說:「當年黎明去左韓國一轉,返來同我講要唱快歌!我心諗:快歌,我拿手啦!點知寫畀佢,佢話:都跳唔到舞既,聽左都唔想郁,最後佢捉左我去韓國兩個禮拜!」Mark回想那段日子,日日去不同夜店觀摩,他說:「黎明要我觀察,到底播咩歌先會令人跳舞,果次真係一個好好既經驗!」估唔到黎天王居然會落夜店搵靈感噃﹗

LEON呢首《全日愛》真係好洗腦,MV仲見到舒淇添。(影片截圖)
19歲嘅女神全智賢呀﹗(資料圖片)

除左歌曲之外,Leon更係第一批與韓國娛樂圈緊密合作嘅香港歌手,99年及01年演唱會Dancers已經係全部來自韓國,更加獨具慧眼,喺全智賢啱啱出道,仲未有知名度嘅時候,已經快人一步睇中佢合作拍廣告。Leon喺韓國當地人氣高企,曾經喺1998年為韓劇《我心蕩漾》獻唱主題曲《사랑한 후에》(廣東話版本《我這樣愛你》)。多年嚟Leon仍然有大量韓國粉絲。2016年12月Leon出席《MAMA亞洲音樂大獎2016》擔任壓軸頒獎嘉賓,更加令一眾韓星變晒小FANS排隊要求合照,人氣可見一斑。

Leon出席《MAMA亞洲音樂大獎2016》頒獎時,於後台被秀智集郵。(網上圖片)
+4