【賤民20．專訪】王宗堯為中年危機鑽牛角尖：沉溺於無力感之中
ViuTV新劇《賤民20》開播一星期，觀眾直指感劇情「一忽忽」，令棄劇指數高達95%！身為男主角嘅王宗堯早前接受訪問時都直認《賤》甚為荒誕，但劇中佢前妻共富貴不難共患難、負資產等狀況，正正係現今社會的實照。
《賤》一劇以陳炳銓、王宗堯、以及吳海昕為首，第一集劇情甚為跳脫，如果唔係同幾位主角做訪問知道發展去向，相信我連十分鐘都嫌多。曾有「民選港姐」之稱嘅吳海昕，首次拍劇就要飾演濫交、性奴、自甘墮落嘅角色，連佢自己都話當初其實好擔心。「同編劇傾完之後，了解我嘅角色其實base on好多新聞而成，例如係被養父強姦，繼而產生妄想症，就好似《踏血尋梅》王佳梅咁，佢唔係缺錢，之不過想藉性去得到一啲嘢。」劇中吳海昕同王宗堯藉性各取所需，到最後女方愛上男方，吳海昕笑言感覺如同「戀父癖」，更指同王宗堯嘅床戲無特別，識睇一定係睇兩女（張敬仁、吳海昕）激吻一幕。
王宗堯於劇中角色因破產而被老婆「飛」，三五不時被追數佬（阮民安)追債，最後迫到企圖謀阿媽副身家。「以前就話處處商機，肯博肯捱就可以，但而家就算你有高學曆都未必請你，一街都係大學生，後生就話博，但當你係享受過嘅中年男人，係咪真係可以有第二春呢？」王宗堯就角色令他反思更多，因為「今日唔知聽日事」。諗住同陳炳銓、吳海昕搵啲嘢做，結果一事無成搞到炸公廁，這種無力感，原來男神也曾經歷過「因為我貪心又固執，成日想做好多嘢同改變一啲嘢，但因為名氣問題，所以影響力好細，雖然唔會自怨自捱，但會沉溺於無力感之中，可能嬲一晚就會轉返出嚟，因為以前試過轉牛角尖轉到好灰好辛苦。」
至於吳海昕的無力感，不用問也知道一定跟「港姐」有關，放棄空姐一職走去選美，得到大熱、得到民選港姐的稱號，但原來並非自己最想做的事。「覺得女人要在花樣年華時做自己想做的事，所以放棄了同TVB合作，之後兩年沉多過浮，電影圈又未入到，於是問屋企人借咗啲錢去外國學戲，一來真係好想學，二來擔心將來有機會但無演技。」學成歸來，吳海昕笑自己更無人氣，幸好當時陳炳銓找她演鏡《賤民20》，唔煙唔酒嘅佢以為落空，結果「予人瘋癲感覺」為她帶來劇中一角。
《賤》緊貼《瑪嘉烈與大衛系列前度》播出，王宗堯指《前度》有口碑又有大星，令他感到一定壓力，吳海昕更提到眾人其實連角色名都無，劇中永遠都係「喂」來「喂」去。但他們都異口同聲表示「如果你有過同樣經歷，睇完會好有感受。」雖然拍攝場口唔係賓館、垃圾站就係地下停車埸，令演員辛苦得要死，但王宗堯認為可以試新嘢係過癮的。「TVB嘅劇一定會有矛盾位、衝突位，我哋offer另一樣嘢比大家，《綠豆》嘅成功就係話比大家唔需要那些原素都可以有得細味。」
吳海昕 :
Stylist :Tiffany Ho
Clothes：iBlues
王宗堯 :
Makeup：Aster Phang
Hair ：King @ Queen's private i
Clothes： MAISON KITSUNÈ
場地提供 : Homemade Party