【同盟】易先生原來唔識浪漫　歐瑞偉：我攞道具花送俾老婆

55歲歐瑞偉在《同盟》飾演易先生，劇中尤如特務００７,身手不凡槍法準、網民看得開心，瑞偉哥歸功於當年一班師兄弟，「因為當年有一班好打得嘅武師、動作指導，自己同過佢哋一齊，學到好多，香港動作片能夠揚威世界，係因為佢哋，所以好多謝佢哋。」瑞偉哥70年代入行，屬於上一代的人，特別念舊重情；劇中奮不顧身保護令小姐，現實中那位令小姐是他的老婆及兩位兒女，歐瑞偉為了他的家人，2000年由大馬回流TVB，曾經是電視劇男主角的他，再回到無綫要由閒角做起，收入更加大不如前，他說：「冇得比架喇，好彩嗰陣有班師兄弟，有時公司冇嘢做，佢哋揾我幫手拉「威也」，幫補下囉，其實老婆仲辛苦，照顧兩個小朋友，唔係易事嚟。」為家人能屈能伸，歐瑞偉比一個打１０個的易先生，更加有型。

「97年金融風暴，我當時喺馬來西亞，嗰度好受影響，所有行業都死，嗰陣有兩條路，一係返大陸，錢係揾到，但我唔想離開屋企，啱啱兩個小朋友出世，唔想睇唔到佢嘅成長....我唔理揾唔揾到錢，但我唔可以長時間見唔到佢哋.....」歐太是馬來西亞演員，二人在當地認識、拍拖、結婚，之後跟歐瑞偉來香港定居，歐瑞偉在《愛‧回家》飾演K C，劇中非常識冧女仔，但現實中瑞偉哥是典型男人浪漫，情話不懂說，行動最實際，他說：「我唔識浪漫，老婆成日投訴，我啱啱早幾日攞紮花返去，老婆望一望：「道具花嚟㗎！」我話係呀！哈哈，不過真花嚟㗎，嗰日拍完《開心速遞》劇入面講我送花俾姚瑩瑩，拍完咪攞返嚟囉，但我送過幾次花俾佢，但都係道具花，買花就真係得結婚嗰一次。」

資深電視迷應該記得《大運河》《神劍魔刀》等劇集，歐瑞偉當時都是男主角之一，再回來重新開始，到現在第二春再來，但歐瑞偉看得淡，他說：「呢行起起跌跌，發生自己嘅，朋友嘅見得多，名利我唔睇得重，今日你發展好好喎，但可能過幾年，當日唔好嗰個，可能突然「砰」一聲追過你，而家嘅心態，收到劇本，咪做好佢囉，同當年返嚟一樣，有冇對白同戲都要做好，喂！有戲有嘢講，先出力呀？唔係咁囉。」上年歐瑞偉拍攝《城寨英雄》，知道要除衫，一收到通知，即日戒鹽油糖，一共減了１５磅。

歐瑞偉視藝員為工作，他不會稱這是他的夢想，但他比很多追夢的人更實在、認真，為演好《愛‧回家》的KC，他會約拍檔Terry（李偉健飾）早一個鐘回公司排練，拍《城寨英雄》他被伍允龍飛腿撞心口，傷到呼吸都痛，但他沒有出聲，因怕拖累了進度，他說：「做好你自己先，有冇咩賺到呢個係後話，唔好諗係咪機會，你鍾意做戲，就唔會諗太多嘢，成日諗我拍完呢套要點？攞到咩獎，賺幾錢，咁你要反問自己，其實你係咪真係鍾意演戲呢？」