《大太監》演員泰國拍特輯不預女眷　曹永廉：早想約阿蕭去旅行　

近日無綫的旅遊節目，均是同一模式製作，包括《一屋老友去旅行》、《胡說八道真情假期》，睇節目人腳都知，全是形象入屋，而且私底下十分老友，柴娃娃無底線，效果當然比起公司安排的主持來得佳，而無綫近日正籌備一個新的旅遊節目，由黎耀祥、蕭正楠、曹永廉、黃浩然擔任主持，齋睇這個陣容就知跟《大太監》如出一轍，讓人相當期待。

其實不少藝人雖然周圍飛登台出騷，但主要還是工作性質，早前黎耀祥在《最佳拍檔》的訪問中，就表示自己10年來除了工作，未去過旅行，而拍攝旅遊節目正好寓工作於娛樂。而這個新旅遊節目的主持之一曹永廉，接受《香港01》訪問，笑說他們雖然是《大太監》的演員，但節目名就未必會加上「大太監」，「其實都係不停砌啲人，睇下邊個得閒，但我知一直都好想我哋幾個拍旅遊節目，覺得我地出嚟嘅效果會幾開心，冇話係因為《大太監》，畢竟套劇已經係5年前。（既然已經咁耐，為何會有這個組合？）可能鍾意我哋玩得囉，互相窒下對方，容易有火花，因為我哋太熟啦，同祥仔、阿蕭、浩然佢地都成日見面食飯嘅。」

確實他們已經有多次合作，尤其是曹永廉跟蕭正楠，更是鐵膽組合，不但在《大太監》中合作，之後還有《公公出宮》、《超時空男臣》，而私底下他們也諗過幾位好朋友一起去旅行，「有諗過㗎，但真係好難度期，依家最好，公司去幫我哋度，就一定OK嘅，容易啲放期。現時初步叫我哋mark咗11月，大約會拍8日，但未知會播出幾多集。（你們會否帶埋家人同行當做旅行，例如阿嫂黃翠如？） 我哋做嘢唔會帶屋企人啦，咁私底下都有同阿蕭和翠如出嚟食飯嘅。」

曹永廉表示自己跟祥仔差不多，只能維持一年一次旅行，「我都係主要做嘢啦，啱啱係佛山拍咗45日外景，當去旅行㗎啦。咁同屋企人去旅行都有嘅，上年同小朋友去咗日本玩，好難就到時間，好似復活節啲小朋友放假，我咁啱開工就陪唔到佢哋，但我太太會陪佢哋嘅，好似啱啱暑假太太就帶咗小朋友去日本玩，係我去唔到啫，唔緊要啦。」

由於節目組還在籌備階段，所以曹永廉只知拍攝地點是泰國，還未知拍攝詳情，「對上一次去泰國都8、9年前，都係一次新體驗，我哋就提議咗希望係歎嘅，住得舒服啲，食啲特別嘅嘢，唔好咁勞碌啦，我哋幾個都年紀大，都係希望我哋帶俾人開心啦。」阿廉跟蕭正楠老友鬼鬼又玩得，隨時有爆肚場面，肯定笑到現腹肌。