杜如風今年初由節目主持化身領隊，帶隊5日4夜暢遊日本名古屋，20位團友每位盛惠$88888，你有你嗌貴但一樣火速爆滿。上星期佢預告農曆新年會再次肩負領隊重責，仲講明：「團費唔止10萬蚊！」堪稱香港史上最貴日本團，到底這6日5夜食住行可以有幾豪？宜家同大家一一披露﹗

這幾年不時在電視見到杜如風（Helen）主持旅遊節目，單係東京都已經做咗超過60集節目，基本上佢個名已經同日本通劃上等號。這日Helen就好開心宣布：「下年初一又開團啦，名額16位！呢個超級豪華團會去東京以及附近嘅箱根溫泉區，仲會玩齊海陸空。」仲可以玩齊海陸空？的確好似幾吸引噃。「Book咗好似林建岳嗰d超豪遊艇，成90呎長同大家出海睇夕陽；又會帶大家坐直升機俯瞰東京，坐嘅巴士都係特別改造，40幾個座位改到得番20個位。今次會坐JAL商務客位，年初一近2萬一位，仲要機位真係好緊張，Business class得24個位俾我地包咗20個。」

代步方面夠晒豪，住宿當然亦唔弱啦，行程會先去箱根住兩晚溫泉旅館：「其實已經包咗8棟Villa，每棟都係有改名，部份仲係一間房有兩個溫泉，報名時已經可以揀定想住哪一棟。」雖然Helen無開名講到時住的是哪一間，不過根據以上提示，箱根地區最豪又可以有8棟Villa，應該就係強羅花壇箱根旅館，全旅館得39間客房，上官網睇番平日入住最平嘅標準雙人房，都過8000港幣（日圓111540）一晚！

咁東京呢？大家都知東京酒店出名細，雙人房有張床有洗手間，想兩件行李一齊打開都無位，超豪團又會點安排？「返到東京市住三晚酒店，會安排過千呎套房俾團友，其實係因為今年初去名古屋嗰團，參加嘅團友話4、5百呎房細咗啲，唔夠放戰利品，所以今次直接升級，全部住過千呎﹗」東京有酒店有咁多過千呎嘅酒店套房？原來係位於東京都千代田區嘅The Capitol東急酒店，睇番官網資料，最細嘅Executive Suite都有105平方米，唔止打開行李，打觔斗都無問題啦﹗上官網check咗，年初一晚價錢大約17萬8千日圓，折合港幣1萬2千蚊一晚，住3晚已經3萬6啦﹗

至於食方面，年初$88888團Helen就話餐餐都有15道風味，又懷石、又和牛……餐餐食龍蝦，仲要每人6隻！呢次團費加碼當然都有其吸引之處，Helen話有幾餐都會食米芝蓮三星餐廳，據知其中一間係連續3年榮登米芝蓮排行榜，主打日本料理嘅虎白，人均消費約2萬日圓。「其實一直未正式定到團費，因為有間日本天皇御用料理我地好想Book，係日皇以及皇室多次光顧嘅一間餐廳，一個餐有成10道菜要慢慢同嗰邊傾，成本可以差好遠。」到底係邊間？佢地話要賣關子，Hits有：位於山梨縣、甲州食材、該餐廳日間一人會席菜單，未計稅每位約9,000日圓（約港幣700元），大家又估唔估到係邊間？

其實再次帶團Helen都話自己好驚，因為收得人地咁多團費怕被人投訴：「好似年初嗰團，團友大約40幾歲，有兩個小朋友，家庭客奶奶客較多。團友有d都有keep聯絡，自己本身都戰戰競競，好在報得嘅好多都因為鍾意自己，錫住我咋！」

對於呢次團費起碼10幾萬，Helen笑言其實2人成團，所以唔太擔心：「年初去名古屋20個位，一開放報名已經有10幾個確認，有4個俾咗訂又突然去唔到撻訂再慢慢收，最終都爆到，月尾出資料再睇下反應啦。」身邊嘅旅行社負責人袁振寧這個時候插口：「一公布下年又開團，有個女仔已經打嚟話想包團，唔係佢Boss要去，而係想包起成團請同事遊埠。要等月尾出晒資料再睇情況。」Helen聽到第一個反應，係問究竟邊間公司對員工咁好，原來有機會一推出就爆滿，難怪10幾萬團費一位都咁淡定啦﹗