【九州攻略】杜如風出海遇上數十條海豚：好想跳落海同佢地游水
熱愛一個地方，可以去到幾盡？杜如風（Helen）單係日本各地區，已經拍咗超過80集旅遊節目，嚟緊10月又有新節目《九州攻略》，被封日本通絕對實至名歸。Helen自細揭日本明星雜誌，即使到加拿大升學，之後更拎埋獎學金到日本讀書。以為當時日文已經同當地人無異？Helen接受香港01訪問時苦笑話：「去到日本先知自己日文唔得，要打三份part time學會話！」
杜如風當年去到加拿大升學，雙主修都揀讀城市規劃及日本研究。畢業後考到每年每個國家只派出5個學位嘅日本文部省（教育局）獎學金，入讀位於東京嘅頂級學府──國立御茶之水女子大學。Helen接受香港01訪問時話，去到先有意料之外嘅事發生：「讀書時拎獎學金去到東京，點知到咗日本驚覺落街買嘢都唔知點溝通，而拎到呢個獎學金去到當地嘅，全部來自世界各地好似聯合國一樣，喺學校完全學唔到日文會話。當時自己心諗，識寫唔夠，要快啲識同人溝通先得，學校又學唔到日常用語，點算好呢？」
由於爸爸杜惠東專門寫日本藝能界新聞，Helen都喺佢薰陶下愛上日本文化，遇到呢個困境，第一時間亦都係打俾爸爸求救：「我問爸爸應該點算好，佢話咁啱有朋友喺領事館林立嘅西麻布區開法國私房菜，叫我去嗰度捧餐做侍應，餐廳好細得10張枱。」喺餐廳要面對面同客人溝通，Helen另外仲有兩份兼職：「當時我同時打三份part time，其實都無咩返學，哈哈！」
Helen由讀書至工作，去日本應該過百次，估唔到呢次拍攝嚟緊10月播出嘅《九州攻略》時，仲可以令佢有意外驚喜：「當時知道要搭4個鐘車程，去一個叫天草嘅地方拍攝，來回8個鐘喎，真係好想打退堂鼓，點知成為最深刻嘅一part。我地坐船出海，周圍有成20、30條海豚圍住隻船！幾想即刻跳落海同佢地游水呀，最衰無帶泳衣咋﹗」佢話天草呢個地方，船家對海豚習性非常熟識，「完全知道邊個時辰方位會出沒，幾乎100%睇得到！」
嚟緊Helen又會帶住超級豪華團遊日本，要面對團友唔同要求其實壓力都唔細，到底帶團辛苦啲定拍節目辛苦啲？「兩者比較的話，一定係拍節目壓力大過帶團，因為要趕item趕日光拍嘢，同埋一點，日本人好準時，有陣時拍攝會有delay，點幾鐘仲拍緊A店，但B店又約咗2點，嗰時真係會好頭暈。」幾乎每次出trip拍攝，Helen都一定病倒入院，不下數次喺熒幕前見到佢吊住鹽水，一樣夾住米高峰繼續講講講：「今次係唯一一次唔使入院，次次都中招，韓國嗰次最嚴重，直情好似斷咗片一樣；而杭州嘅醫院就最靚最好，叫齊中西醫一齊嚟睇我，五星級照顧，睇嚟之後可以考慮拍輯醫院攻略啦我。」